Տավուշի մարզի Իջեւան քաղաքի բնակչուհի,1984թ. ծնված Լիանա Բլբուլյանին մեղադրանք է առաջադրվել ՀՀ քրեական օրենսգրքի 262 հոդվածի 2-րդ մասի 5-րդ կետով («Պոռնկությամբ զբաղվելուն նպաստելը` երկու եւ ավելի անձանց օգտագործելով»): Նախկինում դատված Լ. Բլբուլյանը որպես մեղադրյալ է ներգրավվել այն բանի համար, որ նա, 2013թ. հունվարի 28-ից մարտի 30-ն ընկած ժամանակահատվածում որպես մատուցողուհի աշխատելով Իջեւան քաղաքի Վասիլյան 7 հասցեում գտնվող շոգեբաղնիքում, պոռնկությամբ զբաղվելու համար շոգեբաղնիքը պարբերաբար տրամադրել է Իջեւան քաղաքի բնակչուհի մարմնավաճառ 3 կանանց:
Մարմնավաճառ կանայք եւ շոգեբաղնիքի հաճախորդ մի տղամարդ դատարանում ցուցունք են տվել, որ Լիանա Բլբուլյանը շոգեբաղնիքի հաճախորդ տղամարդկանց առաջարկել է 10 հազար դրամ վճարով օգտվել մարմնավաճառների ծառայություններից, զանգահարել է այդ կանանց, հրավիրել շոգեբաղնիք, սակայն իր միջնորդության համար գումար չի վերցրել:
Ինչպես տեղեկացնում է «Դատալեքս» կայքը, ամբաստանյալ Լ. Բլբուլյանը նախաքննության եւ դատաքննության ընթացքում առաջադրված մեղադրանքում իրեն մեղավոր չի համարել, սակայն դատական վիճաբանությունների փուլում հայտնել է , որ իրեն լիովին մեղավոր է ճանաչում, զղջում է կատարածի համար, ասելով, որ ինքը սկսնակ աշխատող է եղել եւ չի հասկացել արարքի հասարակական վտանգավորությունը: Տավուշի մարզի ընդհանուր իրավասության առաջին ատյանի դատարանը որպես Լ. Բլբուլյանի պատասխանատվությունը եւ պատիժը մեղմացնող հանգամանք հաշվի է առել, որ նա իր խնամքի տակ ունի մինչեւ 14 տարեկան երկու երեխա: Ինչ վերաբերում է ամբաստանյալի նախկին դատվածությանը, այն մարվել է եւ ՀՀ քրեական օրենսգրքի 84 հոդվածի հիմքով չի կարող գնահատվել ի վնաս ամբաստանյալի:
Նոյեմբերի 7-ին դատավոր Ռաֆիկ Մելքոնյանը Լ. Բլբուլյանին մեղավոր է ճանաչել ՀՀ քրեական օրենսգրքի 262 հոդվածի 2-րդ մասի 5-րդ կետով եւ դատապարտել 3 տարի ժամկետով ազատազրկման: Դատարանը վճռել է ՀՀ քրեական օրենքսգրի 70 հոդվածի կիրառմամբ նշանակված պատիժը պայմանականորեն չկիրառել եւ սահմանել 4 տարի ժամկետով փորձաշրջան, որի ընթացքում ամբաստանյալի վարքի հսկողությունը իրականացվելու է ՀՀ արդարադատության նախարարության քրեակատարողական վարչության այլընտրանքային պատիժների կատարման բաժնի Տավուշի բաժանմունքի կողմից:
Կարդացեք նաև
Ոսկան ՍԱՐԳՍՅԱՆ
Հետաքրքր է, ինչու նույն օպերատիվությամբ չեն ձերբակալում եւ դատում կոմայգու մոտ կանգնող անհայտ սեռի մարմնավաճառների հովանավորներին: