2012թ. ապրիլի 24-ն Տավուշի մարզի Ջուջեւան գյուղում «ՎԱԶ-2102» մակնիշի ավտոմեքենան դուրս գալով ճանապարհից՝ հարվածել է քարին եւ շրջվել: Նոյեմբերյանի բնակիչ, 1975թ. ծնված Սասուն Խաչիկյանին մեղադրանք էր առաջադրվել, որ նա վարելով իրեն պատկանող ավտոմեքենան,ճանապարհային երթեւեկության անվտանգությանը հակասող գործողություններ է կատարել,որի հետեւանքով մեքենայի ուղեւորը՝ Նոյեմբերյանի բնակիչ Սմբատ Գուլքանյանը տեղում մահացել է: Սասուն Խաչիկյանը վթարի հետեւանքով վնասվածքներ է ստացել, տեղափոխվել «Էրեբունի» ԲԿ: Ավտովթարի հետեւանքով զոհված Ս. Գուլքանյանը Ս. Խաչիկյանի քենակալն էր, Նոյեմբերյանի փրկարար ծառայության աշխատակից: Ս. Խաչիկյանին մեղադրանք էր առաջադրվել ՀՀ քրեական օրենսգրքի 242 հոդվածի 2-րդ մասով («Ճանապարհային երթեւեկության եւ տրանսպորտային միջոցների շահագործման կանոնները խախտելը, որն անզգուշությամբ առաջացրել է մահ»):
Տավուշի մարզի ընդհանուր իրավասության դատարանում դատաքննության ընթացքում վկաների տված ցուցմունքներով, ինչպես նաեւ այլ ապացույցներով հիմնավորվել է, որ վթարի ենթարկված մեքենայի ղեկին եղել է ոչ թե դրա սեփականատեր Սասուն Խաչիկյանը (նա վարորդի կողքի նստատեղին քնած է եղել), այլ ՝ Սմբատ Գուլքանյանը: 2013թ. հուլիսի 4-ին Տավուշի մարզի ընդհանուր իրավասության դատարանի դատավոր Ռաֆիկ Մելքոնյանը վճռել է Սասուն Խաչիկյանին առաջադրված մեղադրանքում ճանաչել անմեղ եւ արդարացնել: Այս դատավճռի դեմ վերաքննիչ բողոք է բերել Տավուշի մարզի դատախազ Աննա Մանթաշյանը, ով խնդրել է ամբողջությամբ բեկանել Սասուն Խաչիկյանի նկատմամբ կայացված դատավճիռը, Ս. Խաչիկյանին մեղավոր ճանաչել ՀՀ քրեական օրենսգրքի 242 հոդվածի 2-րդ մասով եւ նրա նկատմամբ այդ հոդվածի սանկցիայով նախատեսված հիմնական եւ լրացուցիչ պատիժների սահմաններում նշանակել համաչափ պատժաչափեր: ՀՀ վերաքննիչ քրեական դատարանը (նախագահությամբ՝ Մ. Պետրոսյանի) վճռաբեկության կարգով քննության առնելով գործը՝ 2013թ. հոկտեմբերի 17-ին որոշել է մասնակիորեն բավարարել Աննա Մանթաշյանի վերաքննիչ բողոքը, բեկանել Ս. Խաչիկյանի վերաբերյալ Տավուշի մարզի ընդհանուր իրավասության դատարանի դատավճիռը եւ գործն ուղարկել նույն դատարան՝ այլ կազմով նոր քննության:
ՀՀ վերաքննիչ քրեական դատարանի որոշման դեմ վճռաբեկ բողոք է ներկայացրել Սասուն Խաչիկյանի պաշտպան, փաստաբան Գուրգեն Հարությունյանը, ով վճռաբեկ բողոքում նշել է, որ ՀՀ վերաքննիչ քրեական դատարանում գործի քննության ընթացքում թույլ են տրվել իրավունքի կոպիտ խախտումներ: Գուրգեն Հարությունյանը խնդրել է բավարարել վճռաբեկ բողոքը եւ բեկանել Ս. Խաչիկյանի նկատմամբ վերաքննիչ քրեական դատարանի վճիռը, օրինական ուժ տալ Տավուշի մարզի ընդհանուր իրավասության դատարանի 2013թ. հուլիսի 4-ի դատավճռին: Վճռաբեկ բողոքի մեջ Գ. Հարությունյանը նշել է. «Փորձաքննության եզրակացությունը գործով ձեռք բերված ապացույցներից մեկն է, այն մյուս ապացույցների նկատմամբ որևէ նախապատվություն ունենալ չի կարող, այն ենթակա է իրավական գնահատման և պարտադիր չի, որ գործով ձեռք բերված ապացույցները լինեն բացառապես նույն բովանդակության, կարևորն այն է, որ դրանք իրենց համակցությամբ թույլ են տալիս հանգելու հետևության, որ դեպքին նախորդող պահին մեքենան վարել է ոչ թե արդարացված Սասուն Խաչիկյանը, այլ տուժող Ս. Գուլքանյանը: Այս առումով զարմանալի է վերաքննիչ դատարանի կողմից նշված ձևակերպումն այն մասին, որ իբր թե առաջին ատյանի դատարանը վեր չի հանել ապացույցների միջև եղած էական հակասությունները և դրանց իրավական գնահատական չի տվել»:
Կարդացեք նաև
Ոսկան ՍԱՐԳՍՅԱՆ
