Ավան եւ Նոր Նորք վարչական շրջանների ընդհանուր իրավասության դատարանի դատավոր Դավիթ Հարությունյանը «Հարսնաքարի գործով» բացելով դատական նիստը՝ տեղեկացրեց, որ մեղադրող Արմեն Մարուխյանը ՀՀ գլխավոր դատախազի տեղակալի հրամանով դեկտեմբերի 25-28-ը գտնվելու է արձակուրդում: Այդ մասին նրանք իրազեկել էին դատարանին նիստը սկսվելուց րոպեներ առաջ՝ էլեկտրոնային փոստի միջոցով:
Մեղադրանքի կողմից տուժողների ներկայացուցիչներ Տիգրան Եգորյանին եւ Լուսինե Հակոբյանին տրամադրվել էր առձեռն նախորդ դատական նիստում հանդես եկած ամբաստանյալներ Նորայր Հայրապետյանի եւ Արթուր Բաբլոյանի պաշտպանների՝ ՝Ե.Սարգսյանի եւ Ա.Խաչատրյանի պաշտպանական ճառերը: Տիգրան Եգորյանը, ըստ դատավորի, ասել էր, որ իր բացակայությամբ կարող են շարունակել նիստը, քանի որ ինքը մեկ այլ գործով չի կարողանալու ներկայանալ դատարան:
Այսօր դատարան չէր ներկայացել նաեւ ամբաստանյալ Արման Խաչատրյանի պաշտպանը՝ ՀՀ փաստաբանների պալատի անդամ Ավագ Լալայանը:
Հետեւաբար, դատարանը հետաձգեց դատական նիստը եւ այն նշանակեց հունվարի 13-ին:
