Ռուսական թիվ 1 մեդիա- հոլդինգի ղեկավարը, որ թվում է, «քիթ սրբելու» ժամանակ պետք է չունենար, հասցրել է ՀՀ-ում ստեղծել «Գրիբոյեդով» ակումբ, որի հավաքներին անձամբ է մասնակցում՝ երեւանյան էլիտար ռեստորաններում ակումբի հավաքներից հետո 500 հազարից մինչեւ 1 միլիոն դրամի հաշիվներ փակելով։ Հայաստանի քաղաքագետների միության նախագահ Հմայակ Հովհաննիսյանը՝ ակումբի մասին:
– Պարոն Հովհաննիսյան, գոյություն ունի «Գրիբոյեդով» ակումբ եւ դուք կարծես կապ ունեք դրա հետ։ Ի՞նչ ակումբ է դա, ի՞նչ է անում։
– Այո, ես մասնակցում եմ։ Դա քննարկումներ են, առանձնապես բան չկա այդտեղ, որովհետեւ ասել, որ դա ինչ-որ արտառոց մի ձեւաչափ է, չի կարելի։ Այդպիսի ակումբներ կան, որոնք կոչված են նպաստելու մտքերի, գաղափարների փոխանակությանը։ Ամիսը մեկ քննարկումներ են, որոնց մասնակցում են հյուրեր։
– Բայց ակումբը կարծես թե գաղտնի է գործում։
Կարդացեք նաև
– Ոչ, սա գաղտնի կառույց չէ։ Ակումբն ընդամենը ընթրիք է, որի ընթացքում մարդիկ գաղափարներ են քննարկում, ինչպես ֆրանսիական լուսավորիչներն ունեին սալոններ։ «Նաիրի» կոնյակով եւ ֆուրշետով, լավ դեսերտով զրույց է։ Այս ընթացքում Անդրանիկ Միհրանյանն է եղել, Նատալյա Նովոշինսկայան, շատ մարդիկ են եղել։ Նաեւ կայք ունենք (երկար փնտրելուց հետո նման կայք չգտանք– հեղ.): Բայց դա ինչ-որ պայմանական քննարկում չէ. շատ կարեւոր է, որ մարդիկ հասկանան, թե ինչ հարցեր են հետաքրքրում տարբեր երկրների մարդկանց, միաժամանակ աշխարհը փոխկապակցված է եւ այն, ինչ կատարվում է օրինակ, Ուկրաինայում, անշուշտ իր արձագանքները կունենա նաեւ Հայաստանում։
– Իսկ ո՞վ է ֆինանսավորում այդ ընթրիքները։
– Դմիտրի Կիսելյովը։ Նա է ակումբի հիմնադիրը, ով նաեւ մի շարք հեղինակավոր, խոշոր մեդիա ընկերությունների հոլդինգի ղեկավարն է եւ միշտ սիրում է ասել, որ միայն այն հնարավորությունը, որ կարող է ամիսը մեկ լինել Հայաստանում, կարող է իրեն դրդել ստեղծելու այս ակումբը։ Մեր ցանկությամբ ինքը հրավիրում է այս կամ այն մշակութային, քաղաքական, հասարակական գործչին, ձեռներեցին։ Օրինակ՝ վերջին քննարկմանը եղել է Ռուբեն Վարդանյանը, ընդամենը օրեր առաջ:
– Հայաստանից ովքե՞ր են «Գրիբոյեդով» ակումբի անդամները։
– Վազգեն Մանուկյանն է, Արմեն Մազմանյանն էր, Տիգրան Լիլոյանը՝ Իտառ-տասսի, Էդվարդ Սանդոյանը, Կարինե Գեւորգյան, ով աշխատում է Մոսկվայի Արեւելագիտության ինստիտուտում, ՆԱՏՕ-ի գրասենյակի ղեկավար Արա Թադեւոսյանը՝ Մեդիամաքս, Շուշանիկ Արեւշատյանը, Եգոր Գլումովը, Շուշան Պետրոսյանը։
Լուսինե ԲԱՐՍԵՂՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
