Երեկ ծայրահեղ ծանր վիճակում, անդամահատված թեւով, հիվանդանոց է տեղափոխվել 25-ամյա Կարո Սիմոնյանը: Ինչպես Aravot.am-ի հետ զրույցում ասաց
վիրաբույժ Արտավազդ Սահակյանը, Կ. Սիմոնյանի թեւը մնալով նոր կառուցվող շենքի վերելակի եւ պատի արանքում ամբողջությամբ ջնջխվել է, հյուսվածքները` ճզմվել ու կտրատվել: Տուժածին սկզբում տեղափոխել են Նաիրի բժշկական կենտրոն, ապա` համալսարանական թիվ 1 հիվանդանոց: Երիտասարդը, թեեւ հիվանդանոց տեղափոխվելիս գիտակցության է եղել, բայց բժիշկ Սահակյանի խոսքերով, շոկային վիճակում էր:
Մի քանի ժամ տեւած բարդ վիրահատությունից հետո երիտասարդի թեւը վերականգնվել է: Արտավազդ Սահակյանը մեզ հետ զրույցում հիվանդի վիճակը գնահատեց ծանր, բայց` կայուն:
Այսօր առավոտյան Կարո Սիմոնյանին երկրորդ վիրահատություն անելու անհրաժեշտություն է առաջացել, քանի որ ինչպես բժիշկ Սահակյանն ասաց, երակներում խցանում է առաջացել:
Կարդացեք նաև
Արտավազդ Սահակյանն ասաց, որ 2-3 շաբաթից նոր միայն պարզ կլինի, թե հիվանդի վիճակն ինչպես կլինի: Հյուսվածքները, խորը վերքերը վերականգնելու համար դեռ մի քանի վիրահատության կարիք կլինի: Ըստ բժշկի, այս պահին բժիշկների նպատակը երիտասարդի ձեռքը վերականգնելն է եղել:
Կարո Սիմոնյանը Ջավախքից էր, որը Հայաստանում աշխատելիս է եղել շինարարության ոլորտում:
Լուսինե ԲՈՒԴԱՂՅԱՆ
Ապրես Արտավազդ Բագրատովիչ:
Այս մարդուն աչքի լուսի պես պետք է պահպանել:Բառեր չեմ գտնում որակելու, նա մեր ազգի հպարտությունն ու փրկիչն է: