Այսօր վարչապետը աշխատանքից ազատեց քաղաքաշինության նախարարության աշխատակազմի ղեկավար Մասիս Բաղդասարյանին՝ իր դիմումի համաձայն: Նա աշխատանքի կանցնի նախկին գլխավոր ճարտարապետ Նարեկ Սարգսյանի ղեկավարած Ճարտարապետական պետական կոմիտեում՝ կրկին որպես աշխատակազմի ղեկավար:
Մշակույթի նախարարության աշխատակազմի ղեկավար Սերգեյ Ավետիսյանը նույնպես ազատվեց աշխատանքից:
Կառավարության նիստին Ջրային տնտեսության պետական կոմիտեի ղեկավար Անդրանիկ Անդրեասյանը հայտնեց, որ Սեւանա լճից ոռոգման նպատակով ջրի բացթողնման չափաքանակները 170–ի փոխարեն պետք է սահմանեն 240 միլիոն խմ: Ջրի չափաքանակն ավելացվում է Արարատյան դաշտավայրում սակավաջրությամբ պայմանավորված: Ա. Անդրեասյանը խոստացավ հարցը լուծել առաջիկա հինգ տարիներին :
Վարչապետ Տիգրան Սարգսյանն առաջարկեց այս հարցը պատշաճ ներկայացնել հանրությանը, քանի այն հասարակական կազմակերպություններին շատ կհետաքրքրի:
Կարդացեք նաև
Կառավարության մեկ այլ որոշմամբ, Էկոնոմիկայի նախարարությանը հատկացվեց 8,4 միլիոն դրամ՝ «Սեւանի իշխանի պաշարների վերականգնման եւ ձկնաբուծության զարգացման համալիր ծրագրի» անկախ տնտեսագիտական փորձաքննության իրականացման համար:
10 միլիոն դրամ էլ կառավարությունն այս նախարարությունը տվեց Մաքսային միության հետ կապված ճանապարհային քարտեզի պատրաստման առիթով Հայաստան ժամանող պատվիրակություններին ընդունելու եւ կազմակերպչական այլ հարցեր կազմակերպելու համար:
Լուսինե ԲՈՒԴԱՂՅԱՆ
