Ուկրաինայի բանակը նախագահ Վիկտոր Յանուկովիչին կոչ է արել անհապաղ միջոցներ ձեռնարկել երկրի իրավիճակը կայունացնելու համար: Հայտնում է «ՌԻԱ Նովոստի»-ն՝ հղում անելով Ուկրաինայի պաշտպանության նախարարության կայքին:
«Արտահայտելով իրենց քաղաքացիական դիրքորոշումը, զինվորականները, Ուկրաինայի զինված ուժերի աշխատակիցները, որոնք ծառայություն են անցնում և աշխատում են Ուկրաինայի պաշտպանության նախարարությունում՝ գերագույն հրամանատարին կոչ են արել օրենքին համապատասխան անհապաղ միջոցներ ձեռնարկել երկրում իրավիճակը կայունացնելու և հասարակության հետ համաձայնության գալու համար», – ասված է հաղորդագրությունում:
Հունվարի 27-ին Ուկրաինայի պաշտպանության նախարար Պավել Լեբեդևը հայտնել էր, որ բանակը երկրի ներքին հակամարտություններին չի խառնվում և չի պատրաստվում մասնակցել լուծումներ գտնելուն: Լեբեդևը սադրանք էր համարել քաղաքական գործիչների կոչերը, որոնցով առաջարկվում էր բանակին օգտագործել քաղաքական ճգնաժամը հաղթահարելու համար:
Պատրաստեց Հովհաննես ԻՇԽԱՆՅԱՆԸ
