Այսօր Գյումրու ավագանու նիստի լրացուցիչ հարցերից մեկը վերաբերում էր Գյումրու ԳԱԼԱ հեռուստաընկերությունից դեռևս 2008 թվականին` նախագահական ընտրությունների թոհուբոհի ժամանակ խլված հեռուստաաշտարակին: Երկրի բարձրագույն իշխանությունները Գյումրու նախորդ քաղաքապետ Վարդան Ղուկասյանին լավ ու վատ արեցին ԳԱԼԱ հեռուստաընկերության հետ` քաղաքապետին պարտադրելով տեր կանգնել Վազգեն Սարգսյան 6ա հասցեում գտնվող տիրազուրկ հեռուստաաշտարակին ու այն նույնիսկ վարձակալությամբ չտրամադրել հեռուստաընկերությանը: Այսպիսով` ամեն ինչ արեցին եթերազրկելու այսպես ասած «անհնազանդ» կեցվածք ցուցաբերած, Լևոն Տեր-Պետրոսյանի հանրահավաքները եթեր հեռարձակած հեռուստաընկերությանը:
Մեկ տարի առաջ «Չապ» ՍՊԸ-ն դիմում էր ներկայացրել Գյումրու քաղաքապետ Սամվել Բալասանյանին` այլևս Գյումրու համայնքի սեփականությունը հանդիսացող հեռուստաաշտարակը վարձակալությամբ ժամանակավոր օգտագործման տրամադրելու և ամենամյա վարձավճարի չափը հաստատելու մասին: Ավագանին այսօր կատարեց քննարկեց դիմումը, թեև բավական ուշացումով, այն հասեցագրվել էր մեկ տարի առաջ: Թե ինչու է ուշացվել այս դիմումի քննարկումը, փոխքաղաքապետ Ռուբեն Սանոյանը Գյումրու ավագանու անդամ Լևոն Բարսեղյանի հարցին ի պատասխան պարզաբանեց, որ ԳԱԼԱ հեռուստաընկերության սեփականատեր Վահան Խաչատրյանն ասել է, որ չի շտապում: Վարձավճար սահմանվեց ամսական 150 հազար դրամը:
Նունե ԱՐԵՎՇԱՏՅԱՆ
