Ուկրաինայի ճգնաժամը կարգավորելու համաձայնագիրը նախատեսում է նախագահական արտահերթ ընտրություններ՝ այս տարվա դեկտեմբերին, ինչպես նաև սահմանադրական փոփոխությունների քվեարկություն՝ սեպտեմբերին, հայտնել է Ուկրաինայի «Տարածաշրջանների կուսակցություն» իշխող խմբակցության առաջնորդ Ալեքսանդր Եֆրեմովը ուկրաինական «Ինտերֆաքս»-ին տված հարցազրույցում:
«Ժամը 12:00-ին (Երևան՝ 14:00) կնախաստորագրվի համաձայնագիրը, որը պատրաստվել է այս գիշեր: Հետո դրա շրջանակներում այն կստորագրի նախագահը և ընդդիմությունը, և, ըստ երևույթին, կնախաստորագրի Ֆրանսիան, Գերմանիան, Լեհաստանը և Ռուսաստանը», – ասել է Եֆրեմովը ուրբաթ առավոտյան՝ ավելացնելով, որ համաձայնագիրը ստորագրելուց 48 ժամ անց պետք է հին սահմանադրություններից մեկին՝ կամ 2004թ. կամ 1996թ., անցնելու օրենք ընդունվի:
«Այնուհետև կամրագրվի սահմանադրության քվեարկության կարգը ու եթե սահմանադրությունը քվեարկության դրվի սեպտեմբերին, ապա դեկտեմբերին կլինեն նախագահական ընտրությունները», – բացատրել է պատգամավորը:
Ուկրաինայում քաղաքական ճգնաժամը կարգավորման համաձայնագիր նախաստորագրելու համաձայնությունը ձեռք է բերվել ուրբաթ օրը Վիկտոր Յանուկովիչի, ընդդիմության առաջնորդների, Եվրամիության և Ռուսաստանի ներկայացուցիչների նախագահի նստավայրում կայացած հանդիպման ժամանակ:
Կարդացեք նաև
Պատրաստեց Հովհաննես ԻՇԽԱՆՅԱՆԸ
