Կապանի կոմբինատի`«Դինո գոլդ մայնինգ քամփնի» փակ բաժնետիրական ընկերության (ներկայիս «Դանդի փրիշս մեթալս Կապան»), նախկին աշխատակից Արմեն Խուրշուդյանը դեռեւս 2013թ.-ի մարտի 13-ին դիմել էր Սյունիքի մարզի ընդհանուր իրավասության դատարան՝ ընդդեմ «Դինո գոլդ մայնինգ քամփնի» ՓԲԸ՝ պահանջելով աշխատանքի վերականգնում եւ հարկադիր պարապուրդի ամբողջ ժամանակահատվածի համար միջին աշխատավարձի բռնագանձում:
Սակայն, նոյեմբերի 15-ի Սյունիքի մարզի ընդհանուր իրավասության դատարանը (նախագահող դատավոր` Ս.Գրիգորյան) հայցը մերժեց, որից հետո նախկին աշխատակիցը դիմեց Հայաստանի Հանրապետության վերաքննիչ քաղաքացիական դատարան՝ բողոքարկելով դատարանի վճիռը:
Ինչպես տեղեկացանք Արմեն Խուրշուդյանի ներկայացուցիչ Արշավիր Խալափյանից՝ վերաքննիչ քաղաքացիական դատարանը փետրվարի 20-ին ի օգուտ իրենց է որոշում կայացրել: «Վերաքննիչ քաղաքացիական դատարանը որոշեց վերաքննիչ բողոքը բավարարել: Բեկանել ՀՀ Սյունիքի մարզի ընդհանուր իրավասության դատարանի 15.11.2013 թվականի թիվ ՍԴ/0111/02/13 վճիռը և գործն ուղարկել նույն դատարան` նոր քննության: Սույն որոշումն օրինական ուժի մեջ է մտնում հրապարակման պահից մեկ ամիս հետո և նույն ժամկետում կարող է բողոքարկվել ՀՀ վճռաբեկ դատարան»,- նշված է դատարանի կայացրած որոշման մեջ:
Ընկերության նախկին աշխատակցին աշխատանքից ազատելու վերաբերյալ պաշտոնական պարզաբանում էինք ստացել` «Դինո գոլդ մայնինգ քամփնի» ՓԲ ընկերության այն ժամանակվա վարչական տնօրեն Հրաչ Ջաբրայանից, ով նշել էր, թե Արմենը գող-ավազակի մեկն է եւ այլեւս ընկերություն ոտք չի դնելու: «Աշխատանքից ազատված Արմենը գող-ավազակի մեկն է: Մենք որոշել ենք, որ Արմենը չպիտի աշխատի, քանի որ առաջին հերթին նա գող է, երկրորդը` 55 աշխատողների ներկայությամբ բացահայտորեն հայտարարել էր, որ Րաֆֆի Հովհաննիսյանի ժողովրդային հավաքին պիտի ներկայանա «Դինո գոլդի» շորերով եւ Րաֆֆիին պիտի բողոքի, որ «Դինո գոլդն» իր բոնուսը չի տվել, երրորդը` գործադուլի իրավիճակ ստեղծելու, կազմակերպելու պատճառով», – տեղեկացրել էր պարոն Ջաբրայանը:
Կարդացեք նաև
Արմեն Խուրշուդյանը մեկ այլ հայցապահանջով էլ 2013թ-ի ապրիլի 9-ին դիմել էլ Սյունիքի մարզի ընդհանուր իրավասության դատարան՝ ընդդեմ Հրաչ Ջաբրայանի` լրատվության միջոցներով զրպարտություն համարվող փաստացի տվյալները հրապարակայնորեն հերքելու, հրապարակայնորեն ներողություն խնդրելու եւ պատվի, արժանապատվության ու համբավին պատճառած վնասի համար գումար բռնագանձելու պահանջով: Ըստ Արմեն Խուրշուդյանի ներկայացուցիչ Դավիթ Արզումանյանի` դատարանը հայցը մասնակի է բավարարել, քանի որ Հրաչ Ջաբրայանը դատարանի դահլիճում մի քանի անգամ ներողություն է խնդրել Արմեն Խուրշուդյանից նրան վիրավորելու համար, ինչպես նաեւ դատարանի վճռով պարտավորվել է 300 հազար դրամի չափով փոխհատուցում տրամադրել ընկերության նախկին աշխատակցին: Իսկ լրատվության միջոցներով զրպարտություն համարվող փաստացի տվյալները հրապարակայնորեն հերքելու պահանջը դատարանը մերժել է:
Դավիթ Արզումանյանը մեզ փոխանցեց, որ համաձայն չեն Սյունիքի մարզի ընդհանուր իրավասության դատարանի այս վճռի հետ եւ մտադիր են առաջիկայում տվյալ մասով բողոքարկել ՀՀ վերաքննիչ քաղաքացիական դատարան:
Մերի ՍՈՂՈՄՈՆՅԱՆ
