Երեկ` մարտի 2-ին, Հայ Առաքելական Սուրբ Եկեղեցին նշեց Բուն Բարեկենդանը: Արարատյան Հայրապետական թեմի երիտասարդական միություններն ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի օրհնությամբ առաջին անգամ կազմակերպել էին Բուն Բարեկենդանի մեծ տոնախմբություն` «Վերականգնում ենք ազգային տոները» խորագրով: Երիտասարդները նպատակ ունեն վերարթնացնել հայկական ազգային սովորույթներն ու տոները:
ԱՀԹ հոգևորականների ուղեկցությամբ տոնախմբությանը մասնակցում էր Տ. Նավասարդ սրբազանը: Ներկա էր նաև Դավիթաշեն վարչական շրջանի ղեկավար Ռուսլան Բաղդասարյանը:
Երիտասարդները տոնը նշում էին «10-10» ձիարշավարանում` տոնի ավանդական բոլոր բաղադրիչներով. լարախաղաց` ծաղրածուի ու զուռնա-դհոլի երաժշտության հետ, հայկական խաղեր` աքլորակռիվ, լախտի, քաշոցի, ձիերով կոխ: Ժողովրդական տոնախմբության մաս էին դարձել նաև Քաջ Նազարի ու Ուստիանի կերպարները, ուրախ ծաղրածուները:
Կարդացեք նաև
ԱՀԹ-ի երիտասարդներին միացել էին Երևանի քաղաքապետին կից երիտասարդության հարցերով խորհրդի անդամ «Նախնյաց հետքերով» մշակութային ՀԿ-ն ու «Պարենք հայերեն» նախաձեռնությունը:
Անցնող շաբաթվա ընթացքում ԱՀԹ երիտասարդաց միությունները Երևանի քաղաքապետարանի հետ համատեղ բոլոր վարչական շրջաններում կազմակերպել էին տոնախմբություններ, որոնք ուղեկցվել էին ազգային երգ ու պարով, խաղերով ու հյուրասիրությամբ:
Արարատյան հայրապետական թեմի մամլո դիվան
