ՀՀԿ խմբակցության պատգամավոր Լեւոն Մարտիրոսյանը, որը «Գովազդի մասին» օրենքում վերջին փոփոխությունների համահեղինակն է, 1in.am-ի հետ զրույցում խոսելով ալկոհոլի՝ առողջության վրա վատ ազդեցության եւ օրինագծի հետեւանքների մասին՝ արդարացել էր, թե «չեմ կարծում, որ գովազդով պիտի գայթակղվեն»
Այս առնչությամբ Aravot.am-ի հետ զրույցում Երեւանի նախկին քաղաքապետ, ՀԱԿ անդամ Վահագն Խաչատրյանը Լեւոն Մարտիրոսյանին հակադարձեց. «Դա ոչ մասնագիտական մոտեցում է: Այնքան պարզունակ է: Նրանք պետք է իմանան, թե գովազդն ինչ է իրենից ներկայացնում եւ գովազդի ազդեցությունը: Երեւի պետք է մի հատ էլ դասախոսություն մեր պատգամավորների համար կարդան, թե ինչ է նշանակում գովազդ: Եթե գովազդը չգայթակղեր, աշխարհն այդ բնագավառին այդքան մեծ ուշադրություն չէր դարձնի, այդքան գումարներ գովազդի վրա չէր ծախսի: Ես չեմ կարծում, որ բիզնեսմեններն այնքան հիմար են, որ անիմաստ գովազդներ են որոշել պատրաստել: Այդպես չի: Հակառակ դեպքում կստացվի, որ հեռուստատեսությամբ թանկ գովազդ պատվիրողները հոգեկան հիվանդներ են, որ մեծ փողեր են ծախսում:
Չեմ ուզում ավելի վատ բառ օգտագործել, դա ուղղակի նաիվ էլ չէ՝ հարցին չտիրապետող մարդկանց կարծիք է: Պատգամավորական կարգավիճակ ունեցող մարդկանց դա հարիր չի, սազական չի: Դա կարող է ասել փողոցում սովորական քաղաքացի, որը չի առնչվում այդ բնագավառի հետ կամ որեւէ կրթություն չունեցող անձնավորություն: Բայց մարդը, որ օրենսդրական գործունեությամբ է զբաղված, գոնե պիտի հասկանա, որ եթե մի բան բերում են օրենքի աստիճան են հասցնում, ուրեմն դա մի կարեւոր բնագավառ է»:
Հռիփսիմե ՋԵԲԵՋՅԱՆ
