Այսօր Գյումրու «Հոկտեմբեր» կինոթատրոնում արդեն 6-րդ անգամ նշվեց խոսքի ազատության տոնը, որը խորհրդանշում է իշխանությունների կողմից հալածված ԳԱԼԱ հեռուստաընկերության հաղթանակը: Հիշեցնենք, որ 2008 թվականի մարտի 25-ին այս հեռուստաընկերությանը եթերազրկումից փրկեցին գյումրեցիները` հանգանակություն կատարելով ու փակելով հարկային մարմնի նկարած մոտ 27 միլիոն դրամի տուգանքը:
Այս տոնը նախաձեռնել է Գյումրու ժուռնալիստների «Ասպարեզ» ակումբի խորհրդի նախագահ Լևոն Բարսեղյանը` ամեն տարի հանձնախումբ կազմելով ու պարգևատրելով աչքի ընկած լրագրողներին, հասարակական գործիչներին: Այս անգամ պարգևատրվեցին Շանթ Հարությունյանը`քաղաքական-քաղաքացիական դիրքորոշումը խիզախորեն արտահայտելու համար, Հետաքննող լրագրողների ընկերակցությունը և hetq.am-ը` օֆշորային հաշիվների ու հարակից խնդիրների հետաքննության եւ բացահայտումների համար,Արգիշտի Կիվիրյանը քաղաքացիական դիրքորոշումը հետեւողականորեն արտահայտելու, ֆեյսբուքյան հրապարակումների համար և այլք:
Լևոն Բարսեղյանը իր ելույթում նշեց, որ խրախուսման և պարգևատրման համար 29 առաջարկ են ստացել և հիշեցրեց, որ այն զուտ լրագրողների ու լրատվամիջոցների տոն չէ: Ըստ նրա, խոսքի ազատությունը շատ լայն մեկնաբանություն ունի, հետևաբար և հարկ են համարել պարգևատրել այնպիսի մարդկանց, որոնք իրենց քաղաքացիական վարքով, հրապարակային գործունեությամբ իրական ավանդ են ունեցել խոսքի ազատության և արտահայտման գործում :
«Խոսքի ազատությունը շարունակում է բախվել բավական լուրջ խնդիրների, շատ մեծ խիզախություն է պետք լինում պարբերաբար հոսանքին հակառակ գնալու համար: Եվ ես համոզմունք ունեմ, որ դա ավելի շատ գենետիակական է, քան կրթություններով է գալիս. մարդիկ, որոնք այդպիսի վարք են դրսևորում, խիզախում են իրենց դիրքը, հայտարարել և պահել իրենց դիրքը ամենալայն իմաստով, չեն փոխվում, և այդ մարդիկ մեր հասարակության մեջ հայտնի են ոչ միայն մեր հատկանշումներով կամ ոչ միայն մեր ասելով, այլ իրենք իրենց կենսագրությամբ արժեք են ներկայացնում բոլորիս համար»,- ասաց Լևոն Բարսեղյանը:
Կարդացեք նաև
«Շիրակ կենտրոն» հ/կ նախագահ Վահան Թումասյանն էլ , խոսելով այն մասին, թե ինչու է խոսքի ազատության տոնը նշվում հենց Գյումրիում, մի հետաքրքիր բնութագիր տվեց այս քաղաքին: «Պատահական չէ, որ Գյումրիում այս տոնը ծնվեց, իհարկե մեզանից յուրաքանչյուրը իր պատճառաբանությունը կարող է բերել , որ ասենք ԳԱԼԱ-ն Գյումրիում է, որ Ասպարեզը Գյումրիում է, քաղաքական առավել ակտիվ օթևանը Գյումրիում է: Առհասարակ, Գյումրին շշմելու իրարամերժ քաղաք է. ամենակատակասեր մարդիկ Գյումրիում են ապրում, ամենալուրջ մարդիկ Գյումրիում են ապրում, ամենառուսամետները Գյումրիում են ապրում , բայց եվրոպական արժեքները ամենաշատ դավանողները կամ այդ արժեքների համար պայքար տվողները Գյումրիում են ապրում: Իրականում ծայրահեղական քաղաք է, գուցե դրանով էլ հետաքրքիր է քաղաքը, գուցե նաև այդ արժեքների համար կարելի է պահպանել այս քաղաքը», -ասաց Վահան Թումասյանը:
Մանրամասները` տեսանյութում:
Նունե ԱՐԵՎՇԱՏՅԱՆ
Շատ ճիշտ է Գյումրին էնքան ծայրահեղական քաղաք է, որ մինչև այսօր Վահան Թումասյանին է հանդուրժում:Իսկ Գալա TV ներկա եղել է միջոցառմանը?, ոչ, ինչու այդ մասին չեք գրում?, որովհետև “Գալան” գտնում է,որ իր անունով բոլորը բիօզնես արեցին`այդ թվում Լևոն Բարսեղյանը և Վահան Թումասյանը`եվրոպական էն արժեքների դավանողները, որոնք անընսդունելի են: