Ֆինանսների նախարար Դավիթ Սարգսյանը այսօր ՀՀԿ երկրորդ «Հայաստան-Մաքսային միություն. Հնարավորություններ եւ մարտահրավերներ» խորագիրը կրող տնտեսական համաժողովի ժամանակ իր զեկույցում անդրադարձավ Մաքսային միության անդամակցության դեպքում հարկային եւ մաքսային ոլորտներում հնարավորություններին եւ խնդիրներին:
Անդրադառնալով մաքսային դաշտում փոփոխություններին՝ նախարարն առանձնացրեց մաքսային ձեւակերպումները եւ թե ինչպե՞ս պետք է դրանք իրականացնել. «Մենք պարտավոր կլինենք ապահովել մաքսային ձեւակերպումների ընթացքում մեկ պատուհանի համակարգով աշխատանքը»:
Դավիթ Սարգսյանը նաեւ նշեց, որ մաքսային մարմինների եւ դրանց պաշտոնատար անձանց որոշումների գործողությունների բողոքարկման համակարգը տարբերվելու է այն համակարգից, որն այսօր գոյություն ունի Հայաստանում. «Մաքսային միության կանոններով ցանկացած շահագրգռված անձ կարող է դիմել բողոքարկման եւ բողոքարկել ցանկացած գործընթաց»:
Մաքսային միության տարածքի ներսում ներմուծման եւ արտահանման համար անուղղակի հարկման մասին խոսելիս՝ նախարարն իր զեկույցում ասաց, որ այս դեպքում որոշակի առանձնահատկություններ են ի հայտ գալիս. «Մասնավորապես՝ եթե Ռուսաստան, Բելառուսիա եւ Ղազախաստան ապրանքների ներմուծումից հետո՝ տասն օրվա ընթացքում, պետք է վճարվեն անուղղակի հարկեր, ապա ՄՄ օրենքով այդ հարկերը պետք է վճարվեն ընդհանուր սկզբունքներով՝ հարկային մարմիններում, ոչ թե մաքսային մարմիններում, եւ այդ վճարումը պետք է իրականացվի ներմուծման հաջորդ ամսվա մինչեւ 20-ը, այսինքն՝ խոսքը գնում է ոչ թե 10 օրվա մասին, այլ ավելի երկար ժամանակահատվածի մասին»:
Կարդացեք նաև
Նա նաեւ հավելեց, որ այն բոլոր ապրանքները, որոնք արտահանվելու են ՄՄ երկրներ դրանց վրա կիրառվելու է ԱԱՀ-ի զրոյական դրույքաչափ:
Նախարարը անդրադարձավ նաեւ մի քանի խնդիրների, որոնք լուծման կարիք ունեն. «Եվրամիության երկրների հետ առեւտրում ունենք GSP + առեւտրի ռեժիմ, ինչը նշանակում է, որ 11 հազար ապրանքատեսակների ԵՄ արտահանումը զրոյական մաքսատուրքով է իրականացվում»:
Պարոն Սարգսյանի խոսքերով՝ Հայաստանը ավելի քիչ ապրանք է արտահանում Եվրոպա, քան ՄՄ երկրներ, մինչդեռ ՄՄ երկրներ արտահանում նման առեւտրի ռեժիմ չունի:
Դավիթ Սարգսյանի խոսքերով՝ մաքսային ամբողջ ենթակառուցվածքի սուբյեկտները համապատասխան լիցենզիա ստանալու եւ գործունեություն ծավալելու համար ՄՄ-ում կանգնում են արգելքների առաջ. «Բավականին խիստ մուտքի կանոններ են, ինչը նշանակում է, որ մեր ավելի փոքր տնտեսվարողները կարող են դժվարություններ ունենալ լիցենզիա ստանալու համար»:
Էլյա ՀՈՎՀԱՆՆԻՍՅԱՆ
