ԵԽԽՎ-ն շարունակում է գարնանային նստաշրջանի աշխատանքները: Այս պահին պատվիրակների հարցեր են հղում հիմնական զեկուցող Ավստրիայի արտաքին գործերի նախարար Սեբաստիան Կուրցին:
ԵԽԽՎ-ում Հայաստանի պատվիրակության անդամներ Նաիրա Զոհրաբյանն ու Նաիրա Կարապետյանը ԵԽԽՎ ամբիոնից բարձրացրին քեսաբահայության խնդիրները: Նաիրա Զոհրաբյանը ԵԽԽՎ ամբիոնից հիշեցրեց, որ մարտի 21-ի առավոտյան թուրքական զինյալ խմբավորումների կողմից հարձակման է ենթարկվել Սիրիայի հայաբնակ Քեսաբ բնակավայրը: Տիկին Զոհրաբյանը կատարվածը որակեց որպես «հայոց ցեղասպանության շարունակություն»: Այնուհետև հարց բարձրացրեց, որ Վեհաժողովը կատարվածի հստակ գնահատական պետք է տա: Ի պատասխան Սեբաստիան Կուրցը նշեց, թե ազգաբնակչության ապահով կյանքի իրավունքը, կյանքի պաշտպանությունը անկախ էթնիկ պատկանելությունից՝ հիմնարար իրավունքներից է:
Այնուհետև ազատ ելույթների ժամանակ նույն հարցը բարձրացրեց նաև Հայաստանի պատվիրակության մեկ այլ անդամ Նաիրա Կարապետյանը: Նշելով, որ ինքն անձամբ է այցելել Լաթաքիա, շփվել քեսաբահայերի հետ ու լսել նրանց խնդիրները, հայտարարեց, թե քեսաբահայերի հետ կատարվածը միջազգային մարդասիրական օրենքի խախտում է, մարդու հիմնարար իրավունքների կոպտագույն ոտնահարում: Այնուհետև հայ պատվիրակը կոչ արեց Վեհաժողովին և բոլոր միջազգային կազմակերպություններին սթափեցնող կոչ անել Թուրքիային՝ հետագայում կանխելով նման դրսևորումները:
Նշենք, որ հայկական պատվիրակության անդամները պատրաստել են քեսաբահայության մասին փաստաթուղթ:
Կարդացեք նաև
Հայաստանի պատվիրակության անդամ Նաիրա Զոհրաբյանը ևս ելույթ ունեցավ: Նա նկատեց, որ Թուրքիայի առաջին դեմքերի հայտարարությունները, թե Քեսաբի դեպքերի վերաբերյալ իրենք ոչինչ չգիտեն, ընդամենը թուրքիզմի հերթական «հնարքն» է: Այս առիթով Նաիրա Զոհրաբյանը հիշեցրեց այն, որ Թուրքիայի հետազոտական կենտրոններից մեկի ղեկավարը այսպիսի հայտարարություն էր արել. «Սիրիայում ունենալ հայկական Սփյուռք, նշանակում է, որ Հայաստանի ձեռքը միշտ կհասնի Թուրքիային»: Նաիրա Զոհրաբյանը եզրափակելով նշեց, թե Վեհաժողովը հստակ գնահատական պիտի տա Քեսաբում կատարվածին: Հիշեցնելով, որ մեկ ամիս անց լրանում է հայոց ցեղասպանության 100-ամյա տարելիցը՝ տիկին Զոհրաբյանը նշեց, թե չպետք է թույլ տալ, որ նման բան կրկնվի: Այնուհետև առաջարկեց ԵԽԽՎ դիտարկող խումբ ուղարկել Քեսաբ,
որ տեղում կարողանան գնահատել իրավիճակը և հետագա քայլեր ձեռնարկել:
ԵԽԽՎ-ում հայկական պատվիրակության անդամ Արփինե Հովհաննիսյանը մանրամասնորեն ներկայացրեց Քեսաբում կատարվածը: Հատուկ ուշադրություն հրավիրեց այն հանգամանքին, որ Քեսաբի վրա հարձակում է կատարվել հենց թուրքական սահմանից և հարձակվողները ամենևին էլ զինյալ ապստամբներ չեն եղել: Ըստ Արփինե Հովհաննիսյանի՝ «Քեսաբում ցեղասպանություն չեղավ, քանի որ ազգաբնակչությունը կարողացավ փախչել»: Բայց նաև զգուշացրեց, որ
պետք է ամեն ինչ անել, ձեռնարկել կոնկրետ քայլեր, որ նման բան չկրկնվի՝ խորհրդանշական համարելով նաև այն, որ Քեսաբի դեպքերը տեղի են ունենում հայոց ցեղասպանության 100-ամյա տարելիցի նախօրյակին:
Հայ պատվիրակների բարձրացրած անհանգստությանը զուգահեռ և Քեսաբահայության խնդիրների վերաբերյալ փաստաթղթի շրջանառությանը դեմ արտահայտվեց Ադրբեջանի պատվիրակության անդամ Գանիրա Փաշաևան՝ նշելով, թե իբր Հայաստանը Քեսաբի հարցն օգտագործում է գործիք՝ արտաքին քաղաքականության իրականացման համար:
Տաթև ՀԱՐՈՒԹՅՈՒՆՅԱՆ
