Ազատամարտիկ Գագիկ Սարուխանյանը նոր կառավարությունից ակնկալիքներ չունի քաղբանտարկյալներ՝ Վոլոդյա Ավետիսյանի, Շանթ Հարությունյանի եւ նրա ընկերների գործերի վերանայման հարցում:
«Վոլոդյա Ավետիսյանը եւ մյուս քաղբանտարկյալները կալանավորվել են այսօրվա իշխող կուսակցության ղեկավար Սերժ Սարգսյանի եւ նրա կամակատարների ձեռքով: Ոչ մի նոր ակնկալիք չունենք, որ իշխանությունների վարած այս քաղաքականության մեջ փոփոխություններ կլինեն, արմատական փոփոխությունների չենք սպասում»,- այսօր «Հենարան» ակումբում ասաց պարոն Սարուխանյանը:
Նա նոր վարչապետի նշանակումը փոխատեղում՝ «ռակիրովկա» որակեց ու ասաց, որ իշխանությունները ոչ թե շախմատ են խաղում, այլ շաշկի. «Թուրը ձեռքներին աջ ու ձախ փրթում են»:
Նրա խոսքով, իրենք շարունակելու են իրենց պայքարը տարբեր ընդվզումներով. «Վոլոդյայի գործը նրա անձով է պայմանավորված եւ խոսքը արդեն մեր երկրի վարկանիշի մասին է: Միջազգային կառույցներն էլ են ընդունել Վոլոդյային որպես քաղբանտարկյալ: Վերջերս որպես քաղբանտարկյալ ճանաչեց նաեւ Շվեյցարիայի արտաքին գործերի նախարարը՝ Դիդիե Բուրկհալտերը, որը ԵԽԽՎ-ում մարդու իրավունքների հանձնախումբն է ղեկավարում»:
Կարդացեք նաև
Նա պատմեց, որ Վոլոդյա Ավետիսյանի ընտանիքը սոցիալապես ծանր վիճակում է. «Տանը ոչ ոք չի աշխատում, մայրը վատառողջ է, չի կարողանում գյուղատնտեսությամբ նույնիսկ զբաղվել»:
Պարոն Սարուխանյանը ենթադրում է, որ Սերժ Սարգսյանի գիտությամբ է Վոլոդյան կալանավորվել. «Երբ Սեյրան Օհանյանը հայտարարեց, որ Վոլոդյան պայմանավորվածություն է խախտել, այդ պահից մեզ համար պարզ դարձավ՝ ինչի մասին է խոսքը: Վոլոդյա Ավետիսյանը մերժել էր Սեյրան Օհանյանի առաջարկը՝ դադարեցնել ցույցերը, մինչեւ ինքը չհանդիպի Սերժ Սարգսյանի հետ, ասել էր՝ դրանից հետո կորոշենք՝ ինչ է լինելու: Այստեղից ենք մտածում՝ Սեյրան Օհանյանը Սերժ Սարգսյանի հետ Վոլոդյա Ավետիսյանի հարցով հանդիպում է ունեցել: Սերժ Սարգսյանը տեղյակ է Վոլոդյայի հարցին»:
Արփինե ՍԻՄՈՆՅԱՆ
