Ինչպես հայտնի է, Գյումրու նորաբաց բժշկական կենտրոնի կառուցվելուն պես ՀՀ նախագահ Սերժ Սարգսյանը, կարևորելով Շիրակի մարզի սոցիալական վատ վիճակը, 1 միլիոն դոլարանոց կորոնորոգրաֆիայի սարք նվիրեց, որը, հիվանդանոցի տնօրեն Արմեն Իսահակյանի փոխանցմամբ, ի սկզբանե առողջապահական կենտրոնը կառուցելու ու կահավորելու ծրագրում նախատեսված չի եղել: Սարքը, ըստ հիվանդանոցի ղեկավարի, գերմանական է, իր որակով եզակի , նույնիսկ մայրաքաղաքում դժվար է նման որակի սարքավորում ճարելը: Սակայն այն երկար ժամանակ չուներ այսպես ասած իր տերը, աշխատեցնողը: Մայիսի 1-ից Գյումրի բնակության է տեղափոխվել սրտաբան Կարեն Միքայելյանը, որը արդեն հասցրել է աշխատեցնել Սերժ Սարգսյանի նվերը ու կարճ ժամանակահատվածում սրտի 7-ը ստենտ տեղադրել:
Ըստ սրտաբանի, ինքը եկել է Գյումրի այն գիտակցմամբ, որ այս քաղաքի բնակիչները երկրաշարժ, շատ դաժանություններ ու սթրեսներ են տեսել,և բնակիչներին օգնություն է պետք: Նա չի դժգոհում Գյումրիի պայմաններից, քաղաքը հավանում է, ասում է , որ հարմար է բնակվելու համար, և մյուս բժիշկներին էլ խորհուրդ է տալիս մտածել տեղափոխության մասին: Ըստ նրա, ինքը եկել է կյանքեր փրկելու, իսկ սրտի հիվանդությամբ տառապողների թիվը Հայաստանում և ամբողջ աշխարհում բարձր մակարդակի է. կազմում է ամբողջ հիվանդությունների 40-50 տոկոսը: Սրտաբանը նաև ասում է, որ Գյումրու սարքավորումները չեն զիջում երևանյան լավագույն կլինիկաների սարքավորումներին:
Գյումրիի բժշկական կենտրոնի տնօրեն Արմեն Իսահակյանի տեղեկացնելով էլ , Գյումրիում փոքր -ինչ նվազ են սրտի ստենդավորման գները, քանի որ հաշվի են առել բնակչության սոցիալապես անապահով լինելը: Ըստ նրա, սրտաբանին մշտապես Գյումրի տեղափոխելով` կարողանում են կյանքեր փրկել, բժիշկը աշխատում է անսահմանափակ ժամաքանակով, գիշեր ու ցերեկ: Նշենք, որ նախկինում սարքավորում ու մասնագետ չունենալու պատճառով, գյումրեցի հիվանդներից շատերի կյանքին վտանգ էր սպառնում:
Կարդացեք նաև
Իսկ թե ինչու պետությունը Գյումրի լուրջ բժիշկներ գործուղելու փոխարեն մեծ գումարներ է ծախսում ոստիկանապետ, դատախազ, քննչական ու հարկային պետ է գործուղում, ընթերցեք վաղվա տպագիր «Առավոտում»:
Նունե ԱՐԵՎՇԱՏՅԱՆ
Վերջին նախադասությունը դզեց
Խնդրում եմ ուղղեք եւ ուշադրություն դարձրեք, շատ հաճախ լրագրողները սխալ են գրում այս բառը՝ ստենՏ ոչ թե ստենԴ (նույ ձեւով էլ ստենՏավորում ոչ թե ստենԴավորում) ․․․
Շնորհակալ ենք դիտողության համար: Ուղղումն արված է