Երեկ՝ մայիսի 29-ին, Հակոբ Պարոնյանի անվան երաժշտական կոմեդիայի թատրոնում կայացավ «Տիկին մինիստրուհին» ներկայացման պրեմիերան՝ ըստ սերբ դասական Բրոնիսլավ Նուշիչի:
Բեմադրիչ Վահե Շահվերդյանը ներկայացման ավարտին կատակեց, թե կարծես քաղաքական բնույթի ներկայացում է ստացվել, ինչի ապացույցը հերոսների արտահայտություններից հետո հնչող ծափերն ու փռթկոցներն էին:
Ներկայացման գլխավոր հերոսը ոչ թե կին նախարար է, այլ նախարարի տիկին` министерша: Նա հերթական անգամ հաստատում է հայտնի իրողությունը, որ հաճախ պաշտոնյաների կանայք են «հարց լուծողը» եւ ոչ թե տվյալ պաշտոնյան: Մինիստրուհուն մարմնավորել էր Նարինե Ալեքսանյանը: Նա համոզիչ խաղաց այն դրվագները, թե ինչպես են պաշտոնյաների կանայք ուրանում իրենց ոչ էլիտար հարազատներին, իսկ ամուսինների պաշտոնազրկվելուց հետո վերադառնում «հին տաշտակին»՝ ներկայացման մեջ կարի մեքենային:
Ներկայացումը , ի թիվս այլոց, դիտելու էին եկել նախկին պաշտոնյաների՝ նախկին արտգործնախարար Վարդան Օսկանյանի ու ՀՀ երկրորդ նախագահ Ռոբերտ Քոչարյանի տիկնայք՝ Նանի Օսկանյանն ու Բելլա Քոչարյանը: Նրանց հարեւանությամբ նստած հանդիսատես կանանցից մեկը տեղից բացականչեց. «Պետք է բոլոր մինիստրուհիներին ստիպել, որ նայեն այս ներկայացումը»: Հանդիսատեսի շարքում էր նաեւ ՀՀ ժողովրդական արտիստուհի Վարդուհի Վարդերեսյանը: Նրա գնահատմամբ, Վահե Շահվերդյանի բեմադրությունը ստացվել էր:
Կարդացեք նաև
Գոհար ՀԱԿՈԲՅԱՆ
Միջակ պիես էր ու միջակ ներկայացում: