«Սպառողների խորհրդատվություն կենտրոն» հ/կ նախագահ Կարեն Չիլինգարյանն այսօր «Երկու երես» մամուլի ակումբում, անդրադառնալով էլեկտրաէներգիայի սակագնի բարձրացմանը, նկատեց, որ արդեն մեկ տարի առաջ էլեկտրաէներգիայի սակագինը բարձրացել էր 27 տոկոսով:
Պրն Չիլինգարյանի համոզմամբ՝ այլ երկրներում, եթե անգամ սակագինը բարձրանում է 2-3 տոկոսով, ապա հասարակությունը ընդվզում է. «Մեզ մոտ էլեկտրաէներգիայի սակագինը բարձրացավ 27 տոկոսով, այն դեպքում, երբ անցյալ տարի նույն ժամանակահատվածում գազի սակագինը բարձրացավ 17 տոկոսով»:
Պրն Չիլինգարյանը փաստեց, որ գազի մասնաբաժինը էլեկտրաէներգիայի ստացման պարագայում ընդամենը 1/3 մասն է կազմում: «Փաստորեն, այդ թանկացումը պետք է լիներ միայն այդ 1/3 մասի չափով, որն էլ կկազմեր շատ քիչ գումար: Կբարձրանար 1,5 դրամով, այլ ոչ թե 8 դրամով»:
Կարեն Չիլինգարյանի պնդմամբ՝ անցյալ տարի էլեկտրաէներգիայի սակագնի բարձրացմանը զուգահեռ՝ Հայաստանի էլեկտրական ցանցերի կողմից ոչ մի դրական շարժ չեղավ մատուցվող ծառայությունները բարելավելու գործընթացում: «Այս պարագայում ուզում են նորից գին բարձրացնել, իբրեւ թե ծառայության որակը բարելավելու նպատակով»:
Կարդացեք նաև
Պրն Չիլինգարյանը օրինակ բերեց տրանսպորտի սակագնի թանկացումը, ասելով, որ սովոր ենք, որ միշտ պատճառաբանում են, թե թանկացնում են՝ ծառայությունների որակը բարելավելու նպատակով. «Քաղաքակիրթ երկրներում բարելավում են, հետո նոր թանկացման մասին խոսում: Իսկ Հայաստանում հակառակ գործընթացն է ընթանում»:
Սպառողների միության նախագահ Արմեն Պողոսյանի կարծիքով էլ՝ թանկացումները վերջ չունեն: Պրն Պողոսյանի համոզմամբ՝ Հայաստանում վարվում է արատավոր տնտեսական քաղաքականություն. «Չկա այն գիծը, որի միջոցով կերեւա, թե ինչպես պետք է ավելանան մարդկանց եկամուտները, ինչպես պետք է կոմպենսացնել բոլոր թանկացումները եւ ի՞նչ է անելու երկիրը՝ տնտեսական դրական տեղաշարժ ապահովելու համար»:
Էլյա ՀՈՎՀԱՆՆԻՍՅԱՆ
