Ինչո՞ւ է հանձնաժողովը ինքը, սեփական նախաձեռնությամբ առաջարկել էլեկտրաէներգիայի սակագնի բարձրացումը`հարցը հնչեցրեց ՀՀԿ խմբակցության ղեկավար Վահրամ Բաղդասարյանը: Այն ուղղված էր Հանրային ծառայությունները կարգավորող հանձնաժողովի նախագահ Ռոբերտ Նազարյանին: Հարցը հնչեց «ՀՀ հանրային ծառայությունները կարգավորող հանձնաժողովի կողմից էներգետիկայի սակագնի փոփոխման որոշման եւ հիմնավորման վերաբերյալ» թեմայով խորհրդարանական լսումների ժամանակ:
«Ինչու սեփական նախաձեռնությամբ…. եթե Դուք մի փոքր հետադարձ հայացք գցեք, ապա կտեսնեք, որ երբեւէ էլեկտրաէներգիայի սակագնի բարձրացում հայտով չի եղել, եղել է հանձնաժողովի սեփական նախաձեռնությամբ: Մենք ունենք պաշտոնական գրություններ բոլոր կայաններից ու ընկերություններից, որոնցում նույնիսկ պահանջվում էր սակագնի բարձրացումը հունվարի մեկից: Բայց մենք ասացինք` տարի փակվի կգնա: Չստացվեց»,- պատգամավորին պատասխանեց Ռոբերտ Նազարյանը`հավելելով. «Հիմա պաշտոնապես հայտարարում եմ, որ բոլոր ընկերություններից ունենք գրություններ պահանջների տեսքով` վերանայել սակագինը: Ռոբերտ Նազարյանի փոխանցմամբ, սակագնի բարձրացման պահանջով 11 ընկերություն է դիմել հանձնաժողովին: Միայն Որոտանի կասկադը չի դիմել` հասկանալի պատճառով:
Ռոբերտ Նազարյանը նաեւ զարմանքով հակադարձեց`ինչո՞ւ գազի սակագնի բարձրացում կարող է լինել, էլեկտրաէներգիայինը` ոչ:
Հիշեցնենք, որ ՀՀ Հանրային ծառայությունները կարգավորող հանձնաժողովը, հիմք ընդունելով «Էներգետիկայի մասին» ՀՀ օրենքի 22-րդ հոդվածի 5-րդ և 6-րդ մասերը, իր նախաձեռնությամբ սկսել է էլեկտրաէներգիայի արտադրության և ծառայությունների մատուցման, ինչպես նաեւ վերջնական սպառողներին վաճառվող էլեկտրաէներգիայի սակագների վերանայման գործընթացը: Հանձնաժողովի նախնական գնահատմամբ` ընկերություններում առաջացող ֆինանսական ճեղքվածքը փակելու համար նախատեսվում է բոլոր սպառողական խմբերին մատակարարվող էլեկտրաէներգիայի գործող սակագների բարձրացում 3,8-4,3 դրամ/կՎտժ-ի (ներառյալ ԱԱՀ-ն) սահմաններում:
Նելլի ԳՐԻԳՈՐՅԱՆ
