«Չեք ուզում, արդյոք, որ մի քիչ խորանանք ու տեսնենք, թե վատ մենեջմենթը, վատ էկոնոմիկան ինչպե՞ս է ազդում սակագների վրա»
«Ես տեսնում եմ, որ Դուք չեք ուզում դիտել կառավարման ոչ արդյունավետ մակարդակը, ոլորտի առանձին ընկերությունների մենեջմենթի ցածր մակարդակը: Եվ, ի վերջո, այնպես չէ, որ բոլորիս պետք է բավարարեր այն իրավիճակը, որ սակագինը պետք է անընդհատ բերենք ու սպառողների հաշվին բարձրացնենք: Չեք ուզում, արդյոք, որ մի քիչ խորանանք ու տեսնենք, թե վատ մենեջմենթը, վատ էկոնոմիկան ինչպե՞ս է ազդում սակագների վրա»,- այսօր խորհրդարանում, էլեկտրաէներգիայի սակագնի թանկացման թեմայով լսումների ժամանակ դիմելով Հանրային ծառայությունները կարգավորող հանձնաժողովի նախագահ Ռոբերտ Նազարյանին, ասաց ԱԺ փոխխոսնակ Հերմինե Նաղդալյանը: Նա նկատեց, որ, փաստորեն, հանդուրժում ենք, որ այստեղ կորուստը լինի այնքան, ինչքան լավագույն բիզնեսների շահութաբերությունն է լինում մեր երկրում` 13 տոկոս. «Եկեք ավելի շատ խորանանք այդ ամենի մեջ, պարոն Նազարյան, հաշվի առնելով նաեւ, որ պատգամավորներս շատ ենք շփվում քաղաքացիների հետ եւ ամեն ինչի մասին լավ պատկերացում ունենք հենց նրանց շնորհիվ»:
Հանրային ծառայությունները կարգավորող հանձնաժողովի նախագահ Ռոբերտ Նազարյանը նշեց, թե այնպես չի, որ հանձնաժողովին չի հետաքրքրում որեւէ ընկերության արդյունավետ աշխատանքը: Նա համաձայնեց, որ արդյունավետ կառավարումից շատ բան է կախված Հայաստանի էներգետիկայի ոլորտում, բայց մեղավորությունը բարդեց օրենսդրական բացի վրա`շրջանցելով իրենց անտարբերությունը. «Գուցե պետք է օրենսդրական նախաձեռնությամբ հանդես գալ, ընդունել օրենքներ, որ անգամ արտասահմանյան կապիտալ ունեցող ընկերությունների մենեջմենթի մեջ իրավունք ունենանք մտնել: Այսօր նման օրենքի դրույթ չկա, որ կարողանանք մտնել այդ ընկերությունների մենեջմենթի մեջ»:
Հերմինե Նաղդալյան էլ ԱԺ տնտեսական հարցերի մշտական հանձնաժողովի նախագահին առաջարկեց`ստեղծել աշխատանքային խումբ, հանձնաժողով կամ ենթահանձնաժողով, որպեսզի հնարավոր լինի լուծել այդ խնդիրը: Վարդան Այվազյանը համաձայնեց, որ առաջարկը կարեւոր է ու խոստացավ զբաղվել աշխատանքային խմբի ստեղծմամբ, որը անհրաժեշտության դեպքում նաեւ ուսումնասիրություններ կանի:
Կարդացեք նաև
Նելլի ԳՐԻԳՈՐՅԱՆ
