«Լավրովը Ադրբեջանին վստահեցնում էր, որ Հայաստանն առանց Արցախ է անդամակցելու Եվրասիական տնտեսական միությանը»,-այսօր «Հայելի» ակումբում լրագրողների հետ հանդիպմանը, գնահատականներ տալով Բաքում կայացած Ալիև-Լավրով հանդիպմանն, այսպիսի կարծիք հայտնեց Ռազմավարական մշակումների կենտրոնի փորձագետ Աննա Բարսեղյանը:
Նա նկատեց, որ Լավրովի և Ալիևի սակարկման շրջանակը շատ ավելի մեծ է եղել ու հավելեց. «Խոսում ենք եվրասիական ինտեգրման մասին, շահարկում Արցախի թեման, բայց կան նաև այլ գործոններ` Կասպյան ավազանի կարգավորման խնդիրը: Կարծում եմ, որ քննարկման սեղանին է դրված եղել նաև Կասպյան ավազանի եւ Արցախի հարցը»:
Քաղաքագետ Շուշան Խաթլամաջյանը Ալիև-Լավրով «հաճոյախոսությունը» պրոտոկոլային բնութագրեց ու նշեց. «Աշխարհի գլխավոր գերտերությունները վա բանկ են խաղում, ՌԴ-ն չի ձևացնում, որ ցանկանում է ինտեգրվել արևմտյան աշխարհին: Լավրովի այցի օրակարգը որոշ հարցերի վերաբերյալ այո կամ ոչ ստանալու, միմյանց ժամացույցները ճշտելու նպատակ ուներ: Լավրովը գնացել էր Բաքու իմանալու, թե ինչ է Ադրբեջանը մտադիր անել առաջիկայում»: Անդրադառնալով Արցախի խնդրի շուրջ հնչող մտահոգություններին ՀՀ-ի` Եվրասիական անդամակցության պարագայում, տիկին Խաթլամաջյանն ասաց, որ «այդ խոսակցությունները ոչ մի հող չունեն» ու պատասխանեց. «Թե Արևմուտքը, թե Ռուսաստանը չեն ցանկանում, որ ոչ Ադրբեջանը, ոչ Թուրքիան շահեն ու ուժեղանան»:
Aravot.am-ը հետաքրքրվեց` Հայաստանի` մինչև հուլիսի 1-ը Մաքսային միության անդամակցության հեռանկար տեսնո՞ւմ են, թե՞ ՀՀ-ի Եվրասիական միության մեջ ներգրավելու հարցում Ռուսաստանը չի շտապում, տիկին Խաթլամաջյանը պատասխանեց. «Մեր «այո»-ն Ռուսաստանի համար ուղղակի կարևոր էր, որ նա ցույց տար, որ միությունը երկու-երեք պետությունից կազմավորված չէ, որ նա ունի լավ ստարտ ու ապագա: Նույնիսկ, եթե ՀՀ-ն լիներ Ղարաբաղի չափ և իր տնտեսական կարողություններն ու միտումները ավելի համեստ լինեին, ՀՀ դերակատարումը և համաձայնությունը Մաքսային միության սկսնակ ճարտարապետական կառույցում հենց սկզբնական շրջանում մեծ նշանակություն ուներ, նաև քարոզչական տեսանկյունից: Նա ուզում էր ցույց տալ աշխարհին, որ այնպես չէ, որ միայն Նազարբաևն է, որ մրցակցային հարաբերությունների մեջ է Կրեմլի հետ, Բելառուսը, որ Արևմուտքի համար տեղ ունի: Մենք Ռուսաստանին շատ պետք ենք գալոչկայի համար, որ հենակետ ունենա այստեղ»:
Կարդացեք նաև
Աննա Բարսեղյանը Հայաստանի` Մաքսային միության անդամակցության ձգձգումը կապում է Ադրբեջանի պատասխանի հետ: Տարածաշրջանային փորձագետն այս առիթով մանրամասնեց. «ՀՀ-ի` Մաքսային միությանն անդամակցության ձգձգման պատճառն այն է, որ ՌԴ-ն անընդհատ բարձրաստիճան պաշտոնյաներ է ուղարկում այս տարածաշրջան որոշակի հստակեցում ստանալու Ադրբեջանից: Երբ հուլիսին Ադրբեջանի դիրքորոշումը պարզ լինի, կստորագրվի նաև Հայաստանի հետ պայմանագիրը: Ռուսաստանը Ադրբեջանից պատասխան է սպասում և Ադրբեջանի հետ երաշխիքներ ստանալուց հետո նոր Հայաստանի հետ պայմանագիր կկնքվի»:
Տաթև ՀԱՐՈՒԹՅՈՒՆՅԱՆ
