«Սպառողների միության» նախագահ Արմեն Պողոսյանը Երեւանի ավագանուն տուն ուղարկեց, քանի որ ավագանին, ըստ Պողոսյանի, ի օգուտ հանրության չի աշխատում: Այսօր «Պոստ Սկրիպտում» ակումբում պարոն Պողոսյանը «Բարեւ Երեւան» խմբակցության 6 անդամին էլ հորդորեց տուն գնալ, եւ վերադառնալ 46 անդամով: Ասուլիսին ներկա «Բարեւ Երեւանի» անդամ Դավիթ Սանասարյանն էլ համաձայնվեց տուն գնալ, ու ավելի շատ անդամներով վերադառնալ ավագանու կազմ:
Խոսելով քաղաքային տրանսպորտի թանկացման մասին, «Սպառողների միության» նախագահն ասաց, որ քաղաքապետարանի կողմից հրավիրված միջազգային կազմակերպությունը, որը ոլորտն ուսումնասիրել է, ըստ էության, ոչ մի նոր բան չի էլ առաջարկել, արդյունքում միայն իզուր գումար են վճարել այդ կազմակերպությանը:
«Այդ կազմակերպության աշխատանքը զրոյի է հավասար: Երեւանում օրական երթեւեկում է շուրջ 600 հազար մարդ. սա ես տարիներ շարունակ ասել եմ, հիմա այս կազմակերպությունն էլ ասել է, որ ուսումնասիրությունից պարզել է, թե օրական 613 հազար մարդ է երթեւեկում: Ի՞նչը փոխվեց:
Մեր տրանսպորտը գահավիժում է: Երեւանի գլխավոր հատակագծում գրված է` Երեւանի միկրոավտոբուսների թիվը պետք է կազմի 19.2%, այս թիվն այսօր 60-65%-է, իսկ տրանսպորտային այլ միջոցները` ավտոբուսներ, տրոլեյբուս, ավելի քիչ են»,-ասաց պարոն Պողոսյանը, հավելելով` միկրովտոբուսների քանակը 19.2%-ի կհասնի Քրիստոսի 2-րդ գալստյան ժամանակ:
Ինչ վերաբերում է տրանսպորտի տարբերակված ուղեվարձին, այսինքն`100, 150 եւ 200 դրամ սակագնով աշխատող երթուղայիններ, որոնց սակագները կորոշվեն ըստ ծառայությունների որակի, բանախոսներն անընդունելի են համարում:
Կարդացեք նաև
Նելլի ԲԱԲԱՅԱՆ
