Այսօր` օգոստոսի 28-ին, «Արմատ» մամլո ակումբում լրագրողների հետ հանդիպման ընթացքում Կրթության ազգային ինստիտուտի փոխտնօրեն, կրթության փորձագետ Անահիտ Բախշյանն անդրադարձավ ՀՀ կրթության եւ գիտության նախարարության հանրակրթության վարչության պետ Նարինե Հովհաննիսյանի հայտարարությանը, թե դպրոցների համար ջեռուցման խնդիրը լուծված է:
Նա նշեց, որ երեկ զանգահարել է Հայաստանի տարբեր մարզերի ուսուցիչների եւ հարցրել է` արդյոք նրանք ջեռուցո՞ւմ ունեն, պարզվել ր մի շարք դպրոցներում ոչ թե ջեռուցում, այլ ընդհանրապես կոմունալ հարմարություններ էլ չկան.
«Պատրաստ եմ տրամադրել այն դպրոցների ցուցակը, որտեղ ջեռուցում չկա, կոմունալ հարմարություններ չկան, երեխաները զուգարան չունեն կամ այնպիսի վիճակ է, որ պարզապես չեն գնում, օրինակ` Արծվաբերդի դպրոցը»:
Ըստ Անահիտ Բախշյանի ջեռուցում չունեն Արմավիրի մարզի սահմանամերձ Բագարան, Տալվորիկ, Արեւադաշտ գյուղերը, Երասխավանը, Ջանֆիդան, Ջրաշենը եւ այլք, Արագածոտնի մարզում էլ` Նոր Եդեսիա գյուղը, իսկ Գեղարքունիքի մարզում Դրախտիկ եւ Մարտունի գյուղերը.
«Տավուշի մարզում էլ գրեթե բոլոր դպրոցներն ունեն ջեռուցում, բայց որովհետեւ երեխաների թիվը շատ փոքր է, ֆինանսավորումն էլ դրան համապատասխան է, չեն կարողանում գազի փողը մուծել, այսինքն` դպրոցը գումար չունի: Այս խնդիրներն ինչպե՞ս են լուծվում, ես դա չգիտեմ: Ուզում եմ ասել` այն հայտարարությունը, որ տիկին Հովհաննիսյանն է արել շատ հեռու է իրականությունից եւ իրեն պատիվ չի բերում»:
Ամի ՉԻՉԱԿՅԱՆ
