Երեւանի պետական համալսարանի (ԵՊՀ) քիմիայի ֆակուլտետի դեկան Տարիել Ղոչիկյանը , Aravot.am-ի հետ զրույցում անդրադառնալով ԵՊՀ քիմիայի ֆակուլտետի՝ դեղագիտության եւ քիմիայի ֆակուլտետ դառնալուն , հավաստիացրեց, թե դա ընդամենը անվան փոփոխություն է, որը համալսարանին անհրաժեշտ է միջազգային ծրագրերում ընդգրկվելու համար:
«Ֆակուլտետն իր ուղղվածությունը չի փոխել, եթե ասում են ֆակուլտետի ուղղվածության փոփոխություն, ես հասկանում եմ հետեւյալը՝ քիմիայի ծրագրի փոփոխություն, մինչդեռ ընդամենը անվանափոխություն է եղել… Ֆակուլտետի անվան մեջ փոփոխությունը բավարար էր, որպեսզի մասնագետների վերապատրաստման եւ այլ ծրագրերի կարողանանք մասնակցել: Քիմիայից որեւէ ծրագրային փոփոխություն չի եղել, որեւէ պարտադրանք, որ նրանք փոխեն իրենց ուղղվածությունը չի եղել, չկա եւ չի էլ լինի ապագայում, որովհետեւ ի՞նչ կապ ունի դեղագիտության ամբիոնը քիմիայի առարկայական ծրագրերի ձեւավորման հետ: Ամեն ամբիոն իր ծրագրերն է ներկայացնում, եւ ֆակուլտետի խորհուրդը հաստատում է: Ընդ որում, ֆակուլտետի խորհրդի հիմնական մասը քիմիայի մասնագիտացմամբ ամբիոնների աշխատակիցներն են: Դեղագիտության ամբիոնի ներկայացուցիչները չեն կարող որեւէ ձեւով ազդել քիմիա մասնագիտության, մասնագիտացումների, առարկայական ծրագրերի եւ այլնի վրա»,-ասաց պարոն Ղոչիկյանը:
Իսկ մի՞թե հնարավոր չէր ֆակուլտետը կոչել՝ քիմիայի եւ դեղագիտության եւ ոչ թե դեղագիտության եւ քիմիայի ֆակուլտետ: «Միեւնույն է՝ այդ ժամանակ էլի կասեին, թե ուղղվածության փոփոխություն է, ցանկության դեպքում ամեն ինչ կարելի է ասել: Ես ֆակուլտետի անվան փոփոխության մեջ ոչ մի վատ բան չեմ տեսնում, ինչպես դա արել են մեր որոշ գործընկերներ: Ասեմ նաեւ, որ դեղագիտության ամբիոնի վարիչը ծնունդով քիմիկոս է»,-պատասխանեց ԵՊՀ դեղագիտության եւ քիմիայի ֆակուլտետի դեկանը:
Հիշեցնենք, որ ֆակուլտետի գիտխորհրդին ներկա 18 անդամներից միայն ԵՊՀ Անօրգանական եւ անալիտիկ քիմիայի ամբիոնի պրոֆեսոր, ՀՀ ԳԱԱ թղթակից անդամ Սուրեն Խառատյանն ու ԵՊՀ Ֆիզիկական եւ կոլոիդների քիմիայի ամբիոնի վարիչ պրոֆեսոր Շիրազ Մարգարյանն էին «դեմ» քվեարկել քիմիայի ֆակուլտետը՝ քիմիայի եւ դեղագիտության ֆակուլտետ դարձնելու հարցին ու մտահոգվել, որ դա տանում է ֆակուլտետում քիմիայի ստվերման:
Գոհար ՀԱԿՈԲՅԱՆ
Կարդացեք նաև
Լուսանկարը՝ ԵՊՀ կայքից:
Բացարձակ աբսուրդ է: Միջազգային որևէ ծրագիր կախված չէ անվան հետ: