«Թույլ տվեք Ազատության հրապարակում հավաքված մարդկանց անունից մի երկու խոսք ասել Սերժ Սարգսյանին: Սերժ Սարգսյան, դու եկել ես կեղծված ընտրություններով, Մարտի 1-ի թափած արյան վրա: Քո անարդար եւ անփառունակ իշխանավարության արդյունքում ՀՀ-ից արտագաղթել է 250 հազար մարդ, ձախողվել են քո բոլոր արտաքին քաղաքական քայլերը»,- Ազատության հրապարակում իր ելույթում ասաց ՀԱԿ խմբակցության ղեկավար Լեւոն Զուրաբյանը:
Նրա խոսքերով՝ «Այստեղ հավաքված մարդիկ պատասխանն են Լիսկային մարզպետ նշանակելու, սաշիկների անհագուրդ 50 տոկոսանոց փայերի փաթաթմանը, պատասխան կոռուպցիային, ժողովրդի նվաստացուցիչ աղքատությանը: Ժողովրդի համբերությունը սպառվել է: Հանդուրժել ռեժիմը, այլեւս նշանակում է հանդուրժել ՀՀ-ի կործանումը: Դուք եւ ՀՀԿ-ն պետք է հեռանաք»:
Նա ասաց, որ եկել է ժամանակը, որ իշխանությունը հանձնեն ժողովրդին. «Պետք է կամ ընկրկեն ժողովրդի խաղաղ ճնշումից, կամ առերեսվել ժողովրդի ցասմանը: Մենք չենք ցանկանում պատերազմել»:
Լեւոն Զուրաբյանը հայտարարեց, որ իշխանություններին պետք է տալ մի քանի օր ժամանակ «Սա պատվավոր ճանապարհ է քո համար, Սերժ Սարգսյան: Իսկ եթե իշխանությունները համառեն եւ չհամաձայնեն այս ուղով շարժվել, մեր մյուս հանրահավաքը մեկ նպատակով պետք է լինի, համազգային անհնազանդության ալիքով քշել այս իշխանություններին իրենց սիրած ջհանդամի ծոցը: Համաձա՞յն եք այս ծրագրի հետ»:
Կարդացեք նաև
Մարդիկ գոռացին՝ այո՜:
Լեւոն Զուրաբյանն ասաց. «Դե ուրեմն միասին դեպի հաղթանակ: Այնպես պետք է անենք, որ ամբողջ ժողովուրդը արթնանա»:
Հռիփսիմե ՋԵԲԵՋՅԱՆ