Այսօր ԱԺ նիստի սկզբում քվեարկության դրվեց «Շրջանառության հարկի» մասին օրենքը հետաձգելու մասին հարցը:
ՀԱԿ խմբակցության քարտուղար Արամ Մանուկյանը խմբակցության անունից հայտարարեց, որ իրենք կողմ են քվեարկելու օրենքի հետաձգմանը. « Իսկ փետրվարին ամեն ինչ անելու ենք, որ օրենքը չկիրառվի, պատրաստ ենք աջակցելու ՓՄՁ-ներին»:
«Ժառանգություն» խմբակցության ղեկավար Ռուբիկ Հակոբյանն ասաց, որ իրենք ձեռնպահ են քվեարկելու՝ հաշվի առնելով բոլորի մոտեցումը. «Չենք հավատում, որ փետրվարին որեւէ արմատական փոփոխություն կլինի, հաճելիորեն զարմացած կլինենք, եթե այդպես լինի»:
Ի պատասխան Ռուբեն Հակոբյանի՝ ԱԺ նախագահ Գալուստ Սահակյանը արձագանքեց. «Լավատես եղեք»:
Կարդացեք նաև
ԲՀԿ պատգամավոր Միքայել Մելքումյանը ԲՀԿ-ի անունից ասաց, որ ԲՀԿ-ն նույնպես կողմ է քվեարկելու հետաձգմանը. «Արձանագրում ենք, որ սա հարցի լուծում չէ, սա ներկայացնելու է բազմաթիվ սոցիալական շերտերի շահեր: Սա բիզնես չէ: Պետք է գտնենք լուծում եւ չքաղաքականացնենք:
ՕԵԿ խմբակցության ղեկավար Հեղինե Բիշարյանն ասաց. «Պետք է ուշադրություն դարձնենք, որ մեկ կամ երկու ամիս որեւէ օրենք հետաձգելու համար կառավարությունից էլ չգան ԱԺ, սա մեզ համար պատիվ չէ: Մենք ստիպված ենք սա անում: Մեզ համար սկզբունքային է, որ այսօր ՓՄՁ-ները չընկնեն այդ ստուգումների տակ, մինչեւ տեսնենք, թե կառավարությունը ինչ կանի՝ խնդիրը ավելի պատշաճ լուծելու համար»:
Շրջանառության հարկի մասին օրենքն առայժմ չի գործի: Օրենքի հետաձգումն անցավ 110 կողմ, 1 դեմ, 9 ձեռնպահ քվեարկության արդյունքներով:
ՀԱԿ խմբակցության պատգամավոր Նիկոլ Փաշինյանը անդրադարձավ երեկվա դժբախտ պատահարին. «Երեկ Շիրակի մարզում սարսափելի ողբերգություն է տեղի ունեցել, որի հետեւանքով 7 մարդ զոհվել է, 7 հոգի վիրավորվել: Եթե դեմ չեք, մեկ րոպե լռությամբ հարգենք զոհերի հիշատակը»:
Նիկոլ Փաշինյանն ասաց, որ բազմաթիվ նամակներ է ստացել այդ խաչմերուկի հետ կապված. «Կոչ եմ անում տրանսպորտի եւ կապի նախարարությանը, որ ի վերջո այդ, ինչպես գյումրեցիներն են ասում՝ Հոռոմի խաչմերուկին ուշադրություն դարձնեն, այնտեղ պարբերաբար վթարներ են լինում»:
ԱԺ նախագահ Գալուստ Սահակյանն ասաց. «Խորապես ցավում ենք եւ ցավակցում ենք, 1 րոպե լռությամբ հարգենք»: Պատգամավորները ոտքի կանգնեցին եւ հարգեցին զոհերի հիշատակը:
Հռիփսիմե ՋԵԲԵՋՅԱՆ
