«Հայաստանի երիտասարդ կանանց ասոցիացիան» եկող տարվա գարնանից նախաձեռնելու է Լոռու մարզի Ախթալա քաղաքում ստեղծել կանանց սոցիալ-տնտեսական աջակցության կենտրոն: Կենտրոնը փորձելու է մի շարք այլ խնդիրների հետ մեկտեղ նաեւ կանանց զբաղվածության խնդիրը լուծել մարզի 10-ից ավելի համայնքներում: Ինչպես այսօր «Հենարան» ակումբում ասաց ասոցիացիայի նախագահ Լիլիթ Ասատրյանը, կենտրոնում կանանց որոշակի հմտություններ են սովորեցնելու, որպեսզի նրանք ավելի հեշտ կարողանան աշխատանք գտնել:
Լիլիթ Ասատրյանի խոսքերով` «Մենք փորձում ենք որոշակի միջամտությունների արդյունքում հասնել դրական տեղաշարժերի, փոքր սառնարանային տնտեսություններ ստեղծել, որ անտառների հատապտուղները հավաքելով վերամշակեն, արտադրություն ստեղծեն եւ վաճառեն: Սա կտա կանանց եւ նրանց ընտանիքներին աշխատանքի հնարավորություն: Համայնքներն էլ դուրս կգան տնտեսական եւ սոցիալական ծանր իրավիճակից: Հատապտուղների վերամշակման արտադրամասից բացի լինելու է նաեւ տուրիզմի, մշակույթի, պատմական իրադարձությունների եւ ձեռներեցության ոլորտներ, որտեղ ներգրավելու ենք կանանց, նրանք այդ կերպ կնպաստեն համայնքի եւ ընտանիքի տնտեսական կայունությանը»:
Տիկին Ասատրյանի ներկայացմամբ` կենտրոնում պատասխանատու քաղաքացիներ են «ստեղծվելու». սա հնարավորություն կտա կանանց եւ նրանց ընտանիքներին բարձրաձայնել իրենց խնդիրների մասին: Կենտրոնից «դուրս եկած» քաղաքացին սպառողից վերածվում է իր համայնքի համար քաղաքականություն մշակող անհատի. «Համայնքներում կարեւոր է էկոլոգիական խնդիրը, շեշտերից մեկը դնում ենք հենց դրա վրա: Սրա կողքին փորձում ենք համադրել եւ որոշ բաղադրիչներ տեղափոխել արտադրության ոլորտ»:
Հարցին` մարզերի կանայք որքանո՞վ են ոգեւորված, եւ արդյոք պատրա՞ստ են տունը «թողնել» գալ կենտրոն, տիկին Ասատրյանն ասաց, որ երբ ընտանիքում սոցիալական ծանր վիճակ է, այդ կինն այլեւս ի զորու չէ այլ բանի մասին մտածել, չի գիտակցում իր կարեւորությունն իր համայնքի կայացման, որոշումների կայացման գործում եւ այլն, եւ միակ ճանապարհը նրանց խրախուսելն է, իրենց սոցիալական վիճակի բարելավումը:
Կարդացեք նաև
Մանրամասն` տեսանյութում
Իսկ ինչպիսի՞ն է տղամարդկանց վերաբերմունքը, չե՞ն ընդդիմանում, որ իրենց կանայք կամ աղջիկները այցելում են կենտրոն, Լիլիթ Ասատրյանն ասաց. «Լինելով կանանց կազմակերպություն, իհարկե, հիմնական թիրախային խումբը կանայք եւ աղջիկներն են` 13 տարեկանից բարձր, նույնիսկ 80-ն անց շահառուներ ունենք: Մենք կարեւորում ենք տղամարդկանց դերակատարումն, անխտիր բոլոր բնագավառներում, բայց մեր կազմակերպության հիմնական նշանաբաններից է Նժդեհի խոսքը` «Մայրերի ափերի մեջ պետք է փնտրել ազգերի ճակատագիրը»: Մայրիկով է շատ բան պայմանավորված, մենք կարեւորում ենք հասարակության ներսում ներդաշնակությունը, հավասարակշռությունը: Լինում են տղամարդիկ, որ ասում են` ի՞նչ իմաստ ունի, թող մնա տան գործերն անի, եւ մենք սկսում ենք աշխատել այս տղամարդկանց հետ»:
Լիլիթ Ասատրյանի պատմելով, պատահել է, որ հայրը թույլ չի տվել իր անչափահաս աղջիկը, որը լավագույն պոտենցիալն ուներ ծրագրին մասնակցելու, այցելի կենտրոն, հետո ասոցիացիան ծնողի հետ քննարկել է հարցը, եւ վերջինս իր համաձայնությունը տվել է, որոշ ժամանակ հետո այդ տղամարդը նաեւ այլ տղամարդկանց է հորդորել, որ իրենց կանանց, քույրերին ու մայրերին ուղղորդեն «Հայաստանի երիտասարդ կանանց ասոցիացիա»:
Մանրամասն` տեսանյութում
Ասոցիացիան դեկտեմբերի 13-14-ին ժամը 11.00-ից 18.00-ը Երեւանի քաղաքապետարանում բարեգործական տոնավաճառ է կազմակերպելու, որին մասնակցելու են տարբեր մարզերից կին արտադրողներ, միջազգային եւ տեղական կազմակերպություններ: Տոնավաճառից ստացված ողջ հասույթը տրամադրվելու է Հայաստանի մարզերում կանանց տնտեսական մասնակցության խթանման նպատակով իրագործվող ծրագրերին:
Նելլի ԲԱԲԱՅԱՆ
