«Ազատամարտիկներին ծեծելն ու բանտարկելը ոչ մեկիս համար նորություն չէ, և դա շատ տգեղ երևույթ է ինձ համար»,-Aravot.am-ի հետ զրույցում գնահատական տալով ազատամարտիկների նկատմամբ`վերջին օրերին գրանցված ծեծին ու բռնություններին, այսպիսի կարծիք հայտնեց «Ասալա» խմբավորման մարտիկ Վազգեն Սիսլյանը: Նա նշեց, որ չի կարող կանխատեսել, թե դեպքերի զարգացման ինչ ընթացք կգրանցվի:
Մեր այն հիշեցմանը, թե շատերի կարծիքով` այդ միջադեպի գրանցման պատճառն այն էր, որ ազատամարտիկները միացել էին եռյակին և պահանջում էին իշխանափոխություն, պարոն Սիսլյանը պատասխանեց. «Եթե ես էլ այդ բանն ասեմ, պիտի բռնեն ծեծեն, որ բերանս փակե՞ն: Կամ նույն այդ իշխանավորներն այնքան ապուշ բաներ են ասում, որ քաղաքացուն վնաս է հասցնում, պիտի գնան այդ մարդուն ծեծե՞ն»:
Մեր հարցին` սա ինչի՞ արդյունք է, Վազգեն Սիսլյանը պատասխանեց. «Սա ամենատիրության, բռնատիրության արդյունք է: Սա չընդգծված բռնատիրական իշխանություն է: Երբ լսում եմ, թե ԱԺ-ում իրար հետ ինչքան «չակերտավոր» հարգանքով են խոսում, մտածում եմ, որ սրանց լսելն էլ անիմաստ է և իրենց արած գործերն էլ անիմաստ են: Իշխանավորները պետք է հասկանան, թե ինչ է նշանակում պետություն և հասկանան, որ իրենք այսօր այդ աթոռին նստած են, որ ծառայեն, ոչ թե տեր լինեն ամեն ինչին»:
Ըստ «Ասալա»-ի մարտիկի`հասկանալի չէ, թե «իշխանափոխություն հանուն ինչի՞», «իշխանափոխությունից առաջ իշխանավորին պետք է պարտադրել, որ կարգ պահպանեն»: Նա մտահոգված է, թե իշխանավորները երբեք չեն վիճում քաղաքացու իրավունքների, արտագաղթի մասին:
Կարդացեք նաև
Մեզ հետ զրույցում անդրադառնալով երեկ գիշեր տեղի ունեցած դիվերսիոն գործողություններին` պարոն Սիսլյանն ասաց. «Բարեբախտաբար մերոնք կարողանում են հակազդել, ինչու չէ, թող մի անգամ էլ լսենք, որ մերոնք են դիվերսիա իրականացրել: Պետք է պատասխանենք, և չեմ կարծում, որ լարվածությունն ավելի մեծացնելու առիթ կտա դա: Ինչպես գնացին մեր տղերքի աճյունները բերեցին: Մենք էլ նրանց ուղեղները պիտի դնենք այն, որ շուտով Շահումյանն ենք վերցնելու, թող լարված վիճակում մնան: Ոչ, մենք խեղճ չենք, որպես գաղտնի բանակ ողջ աշխարհին սկսեցինք վախեցնել, հաշվի նստեցին հայերի հետ»:
Պարոն Սիսլյանի կարծիքով` լարվածությունն այնքան կպահպանվի, «քանի դեռ Արցախը չի ճանաչվել, Արևմտյան Հայաստանը գրավված չէ, թուրքը մնում է թշնամի»:
Տաթև ՀԱՐՈՒԹՅՈՒՆՅԱՆ