Շաքարային դիաբետով հիվանդները վերջին շրջանում հաճախ էին բողոքում` իրենց, պետպատվերով տրվող դեղորայքի որակից` վստահեցնելով, որ այդ դեղը իրենց համար կողմնակի ազդեցություն է առաջացնում: Խոսքը մասնավորապես` ձեռք բերվող հնդկական դեղի մասին էր, որից շաքարախտ ունեցող որոշ հիվանդներ հրաժարվեցին:
Այսօր առողջապահության նախարարությունում, հանրապետության մի շարք բուժհիմնարկների էնդոկրինոլոգների մասնակցությամբ, տեղի ունեցավ քննարկում, որի ընթացքում առողջապահության փոխնախարար Վահան Պողոսյանը հայտնեց շաքարային դիաբետով հիվանդների դեղը փոխելու մասին: Պարոն Պողոսյանն ասաց, որ կառավարությունը այս տարվանից սկսած` 5 տարի անընդմեջ պետգնումներով ձեռք կբերի ֆրանսիական «ԼեԼաբողատուաղ Սեղվիե» ընկերության դիաբետոն (գլիկլազիդ) 60 մգ դեղը`1 հաբը 0,06 եվրո (42.33 դրամ) գնով:
Վահան Պողոսյանի մեկնաբանությունները` տեսանյութում
Կարդացեք նաև
Ըստ նախարարության մասնագետների, մեր երկրի համար այս տարի կպահանջվի 12 միլիոն դեղահաբ: Ինչպես Aravot.am-ի հետ զրույցում նշեց հանրապետության գլխավոր էնդոկրինոլոգ Էդուարդ Թորոմոնյանը, մեր երկրում 73 հազար շաքարային դիաբետով հիվանդ կա եւ տարեցտարի նրանց թիվը 6-7 հազարով ավելանում է:
Էնդոկրինոլոգն անդրադառնալով հնդկական ծագման դեղամիջոցին, որից սպառողները դժգոհություններ ունեին, ասաց, որ ճիշտ է այն դեղի օրիգինալը չի եղել, բայց ազդող նյութը դրանում նույնն է եղել:
Այդուհանդերձ բժիշկ Թորոմոնյանը գտնում է, որ ֆրանսիական դեղի մասին իրենք լավ տեղեկացված են, բացի այդ այն հիմնված է ապացուցողական բժշկության վրա եւ բժիշկների համար նախընտրելի է դեղի օրիգինալ տարբերակը:
Բժշկի մեկնաբանություններն առավել մանրամասն` տեսանյութում
Վահան Պողոսյանի ներկայացմամբ, ֆրանսիական ընկերությունը առաջարկել է յուրաքանչյուր տարվա պահանջարկի 10 տոկոսը Հայաստանի առողջապահության նախարարությանը տրամադրել անվճար` որպես մարդասիրական օգնություն:
Հարցին, թե հնդկական խմբաքանակից մնացած դեղորայքն ի՞նչ են անելու, պարոն Պողոսյանն ու քննարկմանը ներկա էնդոկրինոլոգները հայտնեցին, որ հնդկական դեղից ավելցուկ չի եղել, սահմանված կարգով տրամադրվել է շահառուներին:
Լուսինե ԲՈՒԴԱՂՅԱՆ
