«Առաքելություն» կուսակցության քաղխորհրդի անդամ Մանուկ Սուքիասյանի համոզմամբ, Գագիկ Ծառուկյանին ու ԲՀԿ-ին ուղղված Սերժ Սարգսյանի հայտնի ելույթից հետո ԲՀԿ առաջնորդի ելույթը պետք է լիներ հաջորդ օրը Ազատության հրապարակում եւ ինքնաբուխ հավաքով հենց այդ օրը ընդդիմությունը պետք է պարտադրեր սեփական օրակարգը:
«Եվ ոչ թե հաջորդ օրը տարածել հայտարարություն, մի հինգ օր հետո հանրահավաք: Ակնհայտ էր, որ հինգ օրում իշխանությունները փորձելու էին առավելագույնս ջախջախել ԲՀԿ-ին»,- այսօր «Հայացք» ակումբում ասաց Մանուկ Սուքիասյանը:
Ներքաղաքական վերջին իրադարձությունները Մանուկ Սուքիասյանի համար նաեւ բացահայտումների փուլ էր. «Ֆիքսվեց, որ նախկին նախագահ Ռոբերտ Քոչարյանի կշիռը քաղաքական գործընթացներում շատ ավելի քիչ է, քան ոմանք պատկերացնում էին: Ռոբերտ Քոչարյանի՝ ԲՀԿ-ի նկատմամբ ճնշումները դադարեցնելու մասին հայտարարությունը ոչ մի դեր չխաղաց, ու ճնշումները նույն կերպ շարունակվեցին: Նույնը կարելի է ասել Հովիկ Աբրահամյանի մասին, նրան վարչապետ նշանակելու հիմնական գործոններից մեկը ԲՀԿ –ի հետ կապն էր: Հիմա փորձը ցույց տվեց, որ Հովիկ Աբրահամյանը չկարողացավ կասեցնել Սերժ Սարգսյանի թիրախավորումը ԲՀԿ-ի նկատմամբ»:
Նա նաեւ առանձնացրեց ռուսաստանաբնակ գործարար Սամվել Կարապետյանի միջամտությունը Սերժ Սարգսյան- Գագիկ Ծառուկյան հակամարտությանը. «Աննախադեպ երեւույթ էր, բայց այդ միջնորդությունից այս երկրի առջեւ ծառացած ոչ մի խնդիր չլուծվեց»:
Կարդացեք նաև
Անդրադառնալով Լեւոն Տեր-Պետրոսյանի երեկվա «կոդավորված» ելույթին՝ նա չցանկացավ մեկնաբանել, միայն ասաց՝ իր համար անցանկալի են փոխադարձ թիրախավորումները ու կարեւոր է հիմա սահմանադրական բարեփոխումների անվան տակ քողարկված արհավիրքի դեմ պայքարել. «Վաղը ընդդիմությանը հիշելու են ոչ թե ով ում հետ է կամ ինչ է խոսում, այլ ով է ջանք գործադրում, որ այդ ավանտյուրան չգա մեր գլխին, ովքեր էին փորձում կասեցնել այդ ծրագիրը:
Չգիտեմ՝ ինչ սին խոստումներով է իշխանությունը խաբել ՀՅԴ-ին սահմանադրական փոփոխությունների հարցում: Բայց ընդդիմությունը պետք է համախմբվի այդ ծրագիրը կասեցնելու հարցում»:
Արփինե ՍԻՄՈՆՅԱՆ
