Մարտի 1-ի զոհերի հարազատները օրերս հրավիրած ասուլիսում հայտարարեցին, որ միայն ՀԱԿ-ն է իրենց հետ, իրենց կողքին է, իրենց վիշտը տանում է, իրենց հետ պայքարում, որ ՀԱԿ-ից անջատված ուժերը մոռացել են Մարտի 1-ի հարցը բարձրացնել:
«Ազատ դեմոկրատներ» կուսակցության փոխնախագահ Անուշ Սեդրակյանն այս առնչությամբ Aravot.am-ի հետ զրույցում ասաց. «Մարտի 1-ի զոհերն իսկապես ազնվաբար նահատակված մարդիկ էին: Հասկանում եմ իրենց հարազատների վրդովմունքը, ցավը: Բայց ողջ այս գործունեության ընթացքում չի եղել մի անգամ, որ չհիշատակվի, Մարտի 1-ի զոհերի հարազատներին արդար հատուցման պահանջը չբարձրացվի: Հայաստանում այսպիսի բնավորություն կա՝ սեփականաշնորհել ողբերգությունները, սեփականաշնորհել քաղաքական պայքարը: Քաղաքական պայքարի պարագայում գուցե դա հասկանալի է, բայց հումանիտար ողբերգությունների պարագայում անհասկանալի է: Սա ես համարում եմ մեր հումանիտար կատաստրոֆան եւ չեմ կարող ասել, որ Հայաստանում որեւէ մեկը կա, որ ցավով չի արձագանքում այդ օրվան»:
Ըստ Անուշ Սեդրակյանի, Մարտի 1-ի բացահայտումը Մարտի 1-ի լիարժեք քաղաքական գնահատականն է: Երբ որ կլինի այդ քաղաքական գնահատականը, Մարտի 1-ը բացահայտված կհամարենք:
Հռիփսիմե ՋԵԲԵՋՅԱՆ
