«Մենք որքան հարգում ենք մեր մեծ գրողներին, նույնքան թերահավատորեն ենք վերաբերվում ժամանակակիցներին»,- կարծում է Հայաստանի գրողների միության (ՀԳՄ) նախագահ Էդվարդ Միլիտոնյանը:
Ըստ նրա՝ շատերն այսօր դասականներին են կարդում, մինչդեռ ժամանակակից գրողների գործերը նույնպես պետք է կարդալ. «Յուրաքանչյուր մեծ գրող իր ժամանակի մեջ նոր գաղափարներ է ներմուծում: Հենց սա է գրողի անկրկնելիությունը,- ասում է Հայաստանի գրողների միության նախագահը,- և եթե պատմությունը կրկնվելու սովորություն ունի, ապա գրականությունը երբեք չի կրկնվում. այն միշտ ժամանակի մտածողության չափանիշներին հարիր տարածքում է»:
Է. Միլիտոնյանը համոզված է, որ գրականությունը դարերով եղել և մնում է հայ ժողովրդի այցեքարտը: Նա վստահ է, որ մենք ունենք և դեռ կունենանք լավ գրողներ:
ՀԳՄ նախագահը տեղեկացրեց, որ առաջիկայում գրքին և գրականությանը նվիրված մի շարք միջոցառումներ են նախատեսված, այդ թվում՝ Մանկական գրքի շաբաթը, որը կմեկնարկի մարտի 26-ից:
Կարդացեք նաև
Իսկ Հայոց ցեղասպանության 100-րդ տարելիցի կապակցությամբ շուտով Գերմանիայում գերմաներենով լույս կտեսնի Եղեռնի զոհ դարձած 11 հայ մեծանուն գրողների՝ Դանիել Վարուժանի, Սիամանթոյի, Ռուբեն Սևակի և այլոց ստեղծագործությունների ընտրանին, որը կտպագրվի նաև ռուսերեն, ֆրանսերեն և անգլերեն: Է. Միլիտոնյանի խոսքով՝ ցանկություն կա այս գրողներին նաև Նոբելյան մրցանակի ներկայացնելու:
ՀԳՄ նախագահը վստահ է, որ նման նախաձեռնությունները պետք է շարունակական լինեն. «Մեր դասական գրողների՝ Ցեղասպանության թեմայով գործերի մի մասը ևս պետք է վերահրատարակվի, թարգմանվի»,- հավելեց նա:
Սիրանուշ ՀԱՅՐԱՊԵՏՅԱՆ
