Երեկ կայացած ՀԱՕԿ-ի գործկոմի նիստում որոշվել է, որ Հայաստանի օլիմպիական պատվիրակությունը մասնակցելու է այս ամռանը Բաքվում կայանալիք Եվրոպական առաջին օլիմպիական խաղերին, ինչի մասին տարածվել է պաշտոնական հաղորդագրություն:
«Առավոտը» նիստից հետո հանդիպեց ՀԱՕԿ-ի գլխավոր քարտուղար Հրաչյա Ռոստոմյանի հետ եւ փորձեց պարզել մի քանի մանրամասներ:
– Որոշվե՞լ է, թե Հայաստանը քանի մարզաձեւերից է մասնակցելու:
– Այո: Մեր օլիմպիական հավաքականները հանդես կգան վեց մարզաձեւերում. Ըմբշամարտ, բռնցքամարտ, ձյուդո, սամբո, հրաձգություն եւ թաեքվոնդո:
Կարդացեք նաև
– Ձեր նշած մարզաձեւերի ֆեդերացիաները ներկա՞ էին քննարկմանը, որը, կարծում եմ, հեշտ չի եղել:
– Անպայման: Առանց նրանց մասնակցության որոշում չէր կարող կայացվել: Բացի գործկոմի անդամներից ներկա էին այդ ֆեդերացիաների լիազորված պատասխանատուները: ՀԱՕԿ-ի նախագահ Գագիկ Ծառուկյանն էլ նշեց, որ թեեւ ՄՕԿ-ի ու ԵՎՕԿ-ի նախագահություններն ամենաբարձր մակարդակով մեր մարզիկների անվտանգության երաշխիքներ են խոստացել, սակայն մասնակցության հարցը պետք է վերջնականապես որոշվի միայն մարզաշխարհի ներկայացուցիչների հետ հանգամանալից քննարկումների արդյունքում: Ի դեպ, պարոն Ծառուկյանն անցած տարի Հայաստան կատարած այցելության ժամանակ այս մասին տեղեկացրել է նաեւ ՄՕԿ-ի նախագահ Թոմաս Բախին ու ԵՎՕԿ-ի նախագահ Պատրիկ Հիկիին:
Բոլոր խնդիրների շուրջ մանրամասն քննարկումների արդյունքում քվեարկությամբ միաձայն որոշվեց, որ Հայաստանի օլիմպիական հավաքականները կմեկնեն Բաքու:
– Իսկ եթե որոշվեր, որ չենք մասնակցելու, դա ի՞նչ հետեւանքներ կարող էր ունենալ:
– Քանի որ մասնակցելու որոշում արդեն կայացվել է, այդ թեմային անդրադառնալու իմաստ չեմ տեսնում:
– Այնուամենայնիվ: Հայ մարզասերներին դա հետաքրքրում է:
– Միջազգային մարզաշխարհում կան հաստատված օրենքներ, որոնց կատարումը պարտադիր է բոլորի համար: Չի կարելի բացառել, որ հակառակ դեպքում մենք կարող էինք կտրվել միջազգային ընդհանուր ընտանիքից, ինչը կարող էր մեծ վնասներ պատճառել հայկական սպորտին:
– Որքան տեղյակ ենք, Բաքվի ամառային խաղերը մարզական առումով ապագայի համար ոչինչ չեն տալու: Մեր հավաքականներն առաջին համարներո՞վ են համալրված լինելու:
– Սա այն դեպքն է, երբ «կարեւորը մասնակցելն է» օլիմպիական կարգախոսը մեր պարագայում չի գործում: Եթե մասնակցելու ենք, ապա լավագույն մարզիկներով, որոնք պայքարելու են հաղթելու համար եւ Հայոց ցեղասպանության 100-ամյակի խորհրդանշական տարում ամեն մի հաղթանակը նվիրելու են 1915 թվականի անմեղ զոհերի հիշատակին:
– Չմոռանանք, որ մրցումներն անցկացվելու են հարեւան երկրի մայրաքաղաքում ու դժվար չէ ենթադրել, որ այնտեղ հնարավոր ամեն բան արվելու է, որպեսզի մեր եռագույնը չբարձրացվի: Նկատի ունեմ մրցավարությունը:
– Մենք արդար մրցավարության հետ կապված մտավախություններ միշտ էլ ունենում ենք: Ու կարեւոր չէ, թե մրցումը որ երկրում է՝ Ադրբեջանո՞ւմ, թե՞ մեկ այլ երկրում: Դրա համար առաջին հերթին մեր մարզիկները պետք է մեկ գլխով բարձր գտնվեն, որպեսզի ոչ մի մրցավար որեւէ բան անելու տարբերակ չունենա: Բացի այդ, մինչեւ Եվրոպական խաղերի մեկնարկը դեռ ժամանակ կա ու մենք բավականին աշխատանք ունենք կատարելու իրավիճակը մեր վերահսկողության տակ պահելու առումով: Դա վերաբերում է թե մեր մարզիկների իրական անվտանգությունն ապահովելուն, թե մրցավարությանը: Այդ ուղղությամբ աշխատում ենք եւ ՄՕԿ-ի ու ԵՎՕԿ-ի եւ միջազգային ֆեդերացիաների հետ:
ԱՇՈՏ ՀԱԿՈԲՅԱՆ
«Առավոտ» օրաթերթ
11.03.2015
