Կարեն Մկրտչյանի կարծիքով՝ հայտարարությունը Մեծի Տանն Կիլիկիո կաթողիկոսության եւ Իրանի Իսլամական Հանրապետության սերտ համագործակցության արդյունք է
Իրանագետ, պատմական գիտությունների թեկնածու Կարեն Մկրտչյանը մարտի 19-ին «Հենարան» մամուլի ակումբում լրագրողերնի հետ զրույցում նշեց, որ Մեծի Տանն Կիլիկիո կաթողիկոսության եւ Իրանի Իսլամական Հանրապետության Մշակույթի եւ կրոնների կազմակերպության Հայոց ցեղասպանությունը դատապարտող համատեղ հայտարարությունը շատ կարեւոր նշանակություն ունի :
«Համատեղ հայտարարությունը ունի ե՛ւ քաղաքական, ե՛ւ կրոնական, ե՛ւ քաղաքակրթական նշանակություն, որովհետեւ դա հետեւանքն է այն կարեւոր գործընթացների, որոնք տեղի են ունեցել Մեծի Տան Կիլիկիո եւ Իրանի Իսլամական Հանրապետության միջեւ: Վերջին 15 տարիների ընթացքում սա կաթողիկոսության եւ Իրանի Իսլամական Հանրապետության սերտ համագործակցության արդյունք է, եւ պատահական չէ, որ սա վեցերորդ նիստն է»,- հայտարարեց նա:
Նրա խոսքերով՝ համատեղ հայտարարության Հայոց ցեղասպանությանը վերաբերող հատվածում նշված է, որ կողմերը՝ կաթողիկոսությունը եւ Իրանի Իսլամական Հանրապետության Մշակույթի եւ կրոնների կազմակերպությունը դատապարտում են Հայոց ցեղասպանությունը, ինչպես նաեւ այն բոլոր ցեղասպանությունները, որոնք կատարվել են անհատների, մարդկանց, պետությունների կողմից. «Եթե սրան նայենք քաղաքական տեսակետից, ապա հետաքրքիր մի նրբություն կա. իրանական կողմը Հայաստանի Հանրապետության հետ նման հայտարարություն չէր կարող ստորագրել. քաղաքական ենթատեքստ կունենար, իսկ կրոնական կազմակերպության դեպքում իր համապատասխան վերաբերմունքն արտահայտեց Հայոց ցեղասպանության 100-րդ տարելիցի նախաշեմին: Կարծում եմ՝ սա շատ գնահատելի է, եւ սրան պետք է ըմբռնումով մոտենալ այն տեսակետից, որ եթե հայկական կողմի հետ անմիջական նման հայտարարություն աներ, քաղաքական ենթատեքստ կունենար, այլ նշանակություն ունի, երբ նա Անթիլիասի հետ է այդ հայտարարությունն անում»:
Կարդացեք նաև
Ամի ՉԻՉԱԿՅԱՆ
