Թուրքիայի նախագահ Ռեջեփ Թայիփ Էրդողանը կոչ է արել Հայկական Սփյուռքին ներկայացնել փաստաթղթեր, որպեսզի լուծվի Օսմանյան կայսրության կողմից 100 տարի առաջ հայերին զանգվածաբար սպանելու վերաբերյալ վիճարկվող հարցը: Այս մասին հաղորդում է Թուրքական Hurriyetdailynews.com կայքը:
«Օ, Հայկական Սփյուռք, մեր փաստաթղթերը այստեղ են: Ինչ փաստաթուղթ էլ ունեք, բերեք»,- ասել է Էրդողանը մարտի 19-ին Ստամբուլում Օսմանյան կայսրության արխիվում տեղի ունեցած ցուցահանդեսի ընթացքում, որը նվիրված էր Առաջին համաշխարհային պատերազմին:
Էրդողանը նաեւ ասել է, որ «Հայկական Սփյուռքը փորձում է ցեղասպանության մասին պնդելով ամբողջ աշխարհում Թուրքիայի նկատմամբ ատելություն սերմանել» եւ հավելել, որ այդ ջանքերը ակտիվացել են 1915 թ. իրադարձությունների հարյուրամյա տարելիցին ընդառաջ:
Նա նաեւ ասել է, որ ինչպես պատմության բոլոր ժամանակաշրջաններում, այնպես էլ մեծ պատերազմի տարիներին ցավ եւ ողբերգություն է եղել, եւ հայերը միակը չեն, որոնք տուժել են: «Բալկաններում եւ Կովկասում ամենամեծ ջարդերը ուղղված մուսուլմանների դեմ եղել են նույն ժամանակահատվածում: Անատոլիայում կային հարյուր հազարավոր մարդիկ, որոնց վնասել են հայերը: Նրանք այնքան շատ են, որքան տուժած հայերը»,- ասել է նա:
Կարդացեք նաև
Էրդողանը նաեւ նշել է, որ Թուրքիան արխիվներում միլիոնավոր դասակարգված փաստաթղթեր է բացել հանրության համար եւ զգուշացրել է Հայկական Սփյուռքին, Երեւանին, ինչպես նաեւ երրորդ երկրներին, նույնը անել, որպեսզի իրականությունը բացահայտվի:
Պատրաստեց Աշոտ ԻՍՐԱԵԼՅԱՆԸ
