«Մեր մոտ ինչ կատարվում է, բոլորը երկու-երեք բանակների են բաժանվում և բոլորն իրենց դատողությունների համաձայն բնութագրում են: Էնպես որ, էդ բնութագրերը շատ վտանգավոր են, երբ որ ասում են ժողովրդի անունից: Այդպիսի մի երևույթ այս պայմաններում Հայաստանում չկա, որ բանակների չբաժանվեն և չսկսեն իրար քարկոծել»,- այսօր խորհրդարանում, լրագրողների հետ զրույցում ասաց ԱԺ նախագահ Գալուստ Սահակյանը: Լրագրողները հետաքրքրվել էին` նախատե՞լ է ՀՀԿ-ական կանանց՝ Ծիծեռնակաբերդում ցուցաբերած պահվածքի համար:
Հիշեցնենք, վերջիններս Ծիծեռնակաբերդում ժպիտներով եւ ծաղիկները թափահարելով գնացել էին հարգելու Ցեղասպանության զոհերի հիշատակը:
«Նախատելու հարց չկար»,- ասաց նա:
Հարցին`ի՞նչ մտածեց, երբ տեսավ ՀՀԿ կանանց՝ Ծիծեռնակաբերդում արված լուսանկարները, ԱԺ նախագահը պատասխանեց, որ որևէ բան չմտածեց. «Ես կարծում եմ, որ այսօր Ծիծեռնակաբերդ գնալը, ինչպես ասեմ, սգո միտինգի վերածելու խնդիր չունի: Ավելի շատ դա կայանալու, կայացնելու և ապագան կերտելու խնդիր ունի: Յուրաքանչյուր մարդ իր դատողությամբ է շարժվում: Խոսքը ոչ թե վերաբերում է, թե ընդհանրապես կանայք ինչպիսին են, ինչ արեցին, այլ ևս մի պահ էր, որ կարելի էր Հանրապետականին խոցոտել»:
Կարդացեք նաև
Նելլի ԳՐԻԳՈՐՅԱՆ
