Գյումրու Արցախ թաղամասում «Պեգաս» խանութի մոտ մարտի 7-ին հնչած կրակոցների գործով ձերբակալված Դավիթ Հակոբյանը, Հովհաննես Տոնոյանը, Համլետ Գեւորգյանը ազատ են արձակվել: Իսկ թե ինչո՞ւ, Շիրակի մարզի դատախազի տեղակալ Արթուր Պողոսյանն Aravot.am-ին ասաց, որ քրեական գործի նախաքննության շահերից ելնելով՝ որեւէ տեղեկատվություն չի կարող տրամադրել:
Փոխարենը մեզ տեղեկատվություն տրամադրեց Հովհաննես Տոնոյանի ու Համլետ Գեւորգյանը փաստաբան Թամարա Յայլոյանը: Փաստաբանը տեղեկացրեց, որ Հովհաննես Տոնոյանի դեպքում ՀՀ վերաքննիչ դատարանը վերացրել է Շիրակի մարզի ընդհանուր իրավասության դատարանի որոշումը, իսկ Համլետ Գեւորգյանի խափանման միջոցը փոխել է Շիրակի մարզի դատախազությունը: «Եթե անհիմն կալանավորել են, ուրեմն պարտավոր են ազատ արձակել: Սա մեծ առաջընթաց է, փաստաբանական հանրույթի շնորհքն է, զգում ենք, որ գնում ենք դեպի իրավական պետություն »,-ասաց Թամարա Յայլոյանը: Համլետ Տոնոյանի խափանման միջոցը փոխած Վերաքննիչ դատարանի դատավոր եղել է Մհեր Աղրամանյանը:
«Դատարանը, հաշվի առավ այն հանգամանքը, որ չկա հիմնավոր կասկած, որ անձը առնչություն ունի քրեական գործի հետ, իսկ Շիրակի մարզի դատախազությունը նպատակահարմար չգտավ Համլետ Գեւորգյանին կալանքի տակ պահել, խափանման միջոցը փոխվեց»:
Երկուսի խափանման միջոցն էլ ստորագրությունն է երկրից չհեռանալու մասին: Փաստաբանն ասաց, որ նրանք գործում ներգրավված են որպես մեղադրյալներ, սակայն ասաց, որ ինքը միջնորդություն է ներկայացնելու, որպեսզի նրանց նկատմամբ հարուցված քրեական գործը կարճեն, քանի որ չկան բավարար հիմքեր, նրանք քրեական գործում ներգրավված լինեն ոչ թե որպես մեղադրյալներ, այլ որպես վկաներ:
Կարդացեք նաև
Նշենք, որ նույն գործող մեղադրյալ Դավիթ Հակոբյանին Վերաքննիչ դատարանը ազատ է արձակել 500 հազար դրամ գրավի դիմաց:
Նունե ԱՐԵՎՇԱՏՅԱՆ
