Այսօր Շուշիի ազատագրման օրն է, եւ Եռաբլուր էին այցելել մի շարք բարձրաստիճան պաշտոնյաներ, ԵԿՄ անդամներ՝ գեներալ Մանվել Գրիգորյանի գլխավորությամբ:
Aravot.am-ը խնդրեց գեներալին իր շնորհավորական խոսքն ասել՝ տոնի կապակցությամբ: Նա պատասխանեց. «Քո գլխավորությամբ՝ հայ ժողովրդին, սաղ աշխարհին, ինչքան հայ մարդ կա առաջին հերթին մաղթում եմ առողջություն, երջանկություն, Հայոց բանակին՝ մարտունակություն, նոր սերնդին՝ ուժեղ, ուժեղ գիտակցություն, միասնություն»:
Մեր հարցին՝ ինչի՞ շնորհիվ մենք հաղթեցինք՝ Մանվել Գրիգորյանը պատասխանեց. «Միասնության, հավատի: Ինքներս մեզ հավատում էինք եւ միասնական էինք»:
Մեր հարցին՝ այսօր ունե՞նք այդ ներուժը՝ նա պատասխանեց. «Ավելի շատ, որովհետեւ նոր սերունդ է աճում: Իմ ժամանակ ես ում պաշտպանել եմ, այդ չծնված երեխեն էսօր ինձ եւ իմ երեխեքին, իմ թոռներին է պաշտպանում»:
Կարդացեք նաև
Մանվել Գրիգորյանն ասաց, որ շատ դժվարություններ են եղել պատերազմում, պատմեց, թե ինչպես են Էջմիածնի ջոկատի 15 տղաներ Քարին տակը պաշտպանել:
Իսկ գեներալ Սեյրան Սարոյանն ասաց. «Շուշիի ազատագրման օրը ավելի շատ հոգեբանական էր: Ժողովուրդ ջան, ռազմական մեծ նշանակություն էր Շուշին Ղարաբաղի համար: Շուշիից հետո իրանց դուխն էլ ընկավ, սկսեցինք կամաց-կամաց սաղ տարածքները ազատագրել, ժողովրդին հեռացրինք թշնամուց: Ես այդ ժամանակ Քելբաջարում էի»:
Սեյրան Սարոյանը պատմեց, որ այն ժամանակ էլ են տարաձայնություններ եղել ազատամարտիկների մեջ,. «Տարբեր ջոկատներ կային, որ մեկը մյուսին չէին լսում: Միշտ էլ եղել ա: Նենց չի, որ էսօր ա, եղել: Էդ ջոկատների կեսը չէին լսում, կեսը գնում էր, կեսը գալիս էր: Շարժի մեջ ա եղել: Էս ազգը միշտ դվիժենիների մեջ ա: Նենց որ, մի նեղվեք: Հա էլ էդ ա եղել»:
Մեր հարցին՝ ինչո՞ւ չեն բնակեցնում ազատագրված տարածքները՝ Սեյրան Սարոյանը չհամաձայնեց. «Ո՞վ ա ասում: Ես Քելբաջարը շատ լավ գիտեմ, որ հիմա համարյա սաղ գյուղերն ապրում են: Լավ գյուղատնտեսություն են զարգացնում, լույսերը քաշել են արդեն համարյա գազաֆիկացման են գնում: Չէ, արվում ա, ո՞նց թե: Այսինքն, ինչքան ժողովուրդ որ ունենք, էլի, մենք մեր ռեսուրսով պտի խոսանք, էլի»:
Հռիփսիմե ՋԵԲԵՋՅԱՆ
