«Ծիրանափող» մշակութային, երիտասարդական հասարակական կազմակերպության անդամները հավաքչական աշխատանքներ են կատարել Շիրակի մարզի 20-ից ավելի համայնքներում, որտեղ բնակվում են Արևմտյան Հայաստանից գաղթած հայերի սերունդների ներկայացուցիչները: Նրանք կրում են արևմտահայության երաժշտական բացառիկ նմուշներ: Այդ մարդկանց միջոցով հավաքագրվել են հին հայկական ժողովրդական երգերը: ՀՀ նախագահի դրամաշնորհային ծրագրի շրջանակներում իրականացվող «Շիրակը` որպես ցեղասպանության ենթարկված արևմտահայության մշակույթի հանգրվան խորագրով ծրագրի» ընթացքում բացահայտված երաժշտական բացառիկ նմուշները հնչելու են մեր պատմական հայրենիքից գաղթած անձանց սերունդների ներկայացուցիչների կատարմամբ: Դրանք ձայնագրվել են և տարածվել համացանցում:
«Ծիրանափող» մշակութային, երիտասարդական հասարակական կազմակերպության նախագահ Ղարիբ Հարությունյանը տեղեկացրեց, որ բացահայտել են 40-ից ավելի երգեր և առանձնացրել ամենից քիչ հայտնի և լավագույն 10 երաժշտական նմուշները: Դրանք երաժշտագետն ու նոտայագրողը նոտայագրել են, այնուհետև ձայնագրել: Ծրագրի շրջանակներում նոտայագրված երգերը տպագրվելու են մեկ ամբողջական գրքույկում: Նախատեսվում է անցկացնել նաև գիտական սեմինար, որի ընթացքում հնչելու են մշակութային արժեքների հետ կապված զեկուցումներ:
Ծրագիրն ունի նաև ռազմավարական նշանակություն: Ղարիբ Հարությունյանը նշեց, թե խնդիր են դրել ցույց տալ, որ Էրգրից մեզ հասած, բայց դեռ անհայտ հայկական մշակութային արժեքներ կան, որոնք պետք է բացահայտել և ներկայացնել հանրությանը: Պատրաստվել են նաև երկու-երեք րոպեանոց ֆիլմեր հարցազրույցների մասնակցած անձանց մասին: Երգերը ձայնագրելու ժամանակ ծրագրի կամավորները նաև զրույցներ են ունեցել Արևմտյան Հայաստանից գաղթած անձանց սերունդների ներկայացուցիչների հետ, լսել նրանց վկայությունները: Պատմում են, թե ինչպես են իրենց նախնիները փրկվել թուրքական յաթաղանից. ի դեպ նրանցից շատերը հենց գաղթի ճանապարհին են լույս աշխարհ եկել:
Տեղեկացնենք, որ ծրագիրը կամփոփվի Հայոց ցեղասպանության 100-ամյա տարելիցին նվիրված համերգով, որի ընթացքում տատիկ-պապիկների կատարմամբ հնչելու են հավաքչական աշխատանքների միջոցով բացահայտված երաժշտական կատարումները` Գյումրու Ժողովրդական գործիքների պետական նվագախմբի նվագակցությամբ:
Կարդացեք նաև
Հայաստանի երիտասարդական հիմնադրամի հասարակայնության հետ կապերի ծառայություն
