Հայաստանում Եվրոպական միության պատվիրակության գրասենյակում անցկացվեց Արևելյան գործընկերության Ռիգայի գագաթաժողովին ընդառաջ տեսակոնֆերանս՝ Եվրամիության բարձրաստիճան պաշտոնյայի մասնակցությամբ:
Հանդիպումն անցնում էր անդամ երկրների մասնակցությամբ, այդ թվում նաև Ադրբեջանի: Նրանք հերթական հարթակն օգտագործելով` կրկին բարձրացրին Լեռնային Ղարաբաղի հակամարտության կարգավորման հարցը: Մինչդեռ ԵՄ պաշտոնյան շտապեց թեման եզրափակել՝ հայտարարելով, որ հակամարտության կարգավորումն ունի մեկ ձևաչափ՝ Մինսկի խմբի ձևաչափը:
Քննարկման թեմաների շարքում՝ Մոլդովայի բանկային ճգնաժամ, Ղրիմ, բարձրացվեց նաև Ադրբեջանում մարդու իրավունքների պաշտպանությամբ զբաղվող անձանց և լրագրողների ազատազրկումների վերաբերյալ խնդիրը: Մասնավորապես հարց հնչեց, թե ինչպե՞ս է ԵՄ-ն վերաբերվում լրագրող Խադիջա Իսմայիլովայի՝ Ադրբեջանում ազատազրկմանը:
ԵՄ բարձրաստիճան պաշտոնյայի մակարդակով դատապարտվեց կատարվածը ու շեշտադրվեց, որ մարդու իրավունքների և մամուլի ազատության պաշտպանության հարցը ԵՄ առաջնահերթություններից է:
Տաթև ՀԱՐՈՒԹՅՈՒՆՅԱՆ
