«Ո՛չ թալանին» նախաձեռնությանը միացած քաղաքացի Վահագն Խաչատրյանը, որն այսօր համակարգում էր Գյումրիում անցկացվող իրազեկման ավտոերթը, Aravot.am-ի հետ զրույցում մեկ անգամ եւս կրկնեց, որ Հայաստանի հանրապետության քաղաքացին կես լումա անգամ չունի տալու ուրիշի թալանածին, գողացածին, թեկուզեւ հանրային ծառայությունները կարգավորող հանձնաժողովն արդեն իսկ հաստատել է հոսանքի թանկացումը:
«Մենք դեմ ենք թանկացմանը, նահանջելու տեղ չունենք, մինչեւ վերջ պայքարելու ենք, որովհետեւ այլ ելք չենք տեսնում: Թանկացումը լինելու է ճակատագրական, եւ մենք չենք ուզում, որ այդ աղետը տեղի ունենա Հայաստանի հանրապետությունում, նույնիսկ կես լումա չի թանկանալու, սա է մեր պահանջը: Եթե իրենք հաշվի չեն առնում քաղաքացու պահանջը, քաղաքացին էլ հաշվի չի առնելու իրենց պահանջը: Մենք կկոշտացնենք մեր պայքարի միջոցները, ինչ օրենքով թույլատրվում է, պատրաստ ենք անելու», ասաց Վահագն Խաչատրյանը:
Նա Հայաստանի էլեկտրական ցանցերի գլխավոր տնօրեն Եվգենի Բիբինի մեղքը չի տեսնում այս հարցում: «Այստեղ խնդիրը Բիբինը չէ, մեզ անարգում են, եւ այստեղ խոսքը մեր իշխանությունների աչքաթողության մասին է, էս ամենի մեղավորը Սերժ Սարգսյանն ու Հովիկ Աբրահամյանն են: «Ո՛չ թալանին» նախաձեռնությունը իր հայտարարության մեջ ասել է՝ եթե դուք մեզ հաշվի չեք առնում, մենք պատրաստ ենք պահանջելու ե՛ւ Սերժ Սարգսյանի, ե՛ւ Հովիկ Աբրահամյանի հրաժարականը»:
Կարդացեք նաև
Ավտոերթին մասնակցող գյումրեցի ազատամարտիկ Գեւորգ Ալիխանյանն էլ ասաց, որ իրենց նպատակը ժողովրդին արթնացնելն է, իշխանությունները քանի գնում, այնքան սանձարձակ են դառնում: Ըստ նրա, քանի ժողովուրդը լռում է, իշխանություններն առիթավորվում ու փորձարկումներ են կատարում ժողովրդի գլխին: Նրա համոզմամբ, միայն համընդհանուր պայքարը կսթափեցնի իշխանություններին, զիջումների կտանի:
«Ժողովուրդ, պայքարում ես, մենք զիջում ենք, չես պայքարում, ուրեմն մեր ուզածով պիտի լինի», -իշխանությունների կարգախոսը այսպես է բնութագրում ազատամարտիկը: Ազատամարտիկի համոզմամբ, ինչքան էլ ուզում է հաստատած լինեն հոսանքի թանկացումը, եթե ժողովուրդը ոտքի կանգնի, ստիպված կլինեն մյուս բոլոր որոշումների պես կասեցնել նաեւ այս մեկը:
Մանրամասները՝ տեսանյութում
Նունե ԱՐԵՎՇԱՏՅԱՆ
