ՀՀ ԱԺ արտահերթ նստաշրջանում քննարկվում է «Հայփոստի» մասնավորեցման հարցը: ՀՀ ԱԺ ԲՀԿ խմբակցության ղեկավար Նաիրա Զոհրաբյանը հիշեցրեց, որ «Հայփոստը» ռազմավարական նշանակության կազմակերպություն է, ուստի հարց բարձրացրեց՝ մասնավորին տալը որքանո՞վ է արդարացված և օրինակ բերեց. «Վաղն էլ կարող է ասենք եկեք Սևանը տանք մասնավորին: Այնպիսի տպավորություն է, որ մեզ շատ փող է անհրաժեշտ ու դրա համար ռիսկերը մինչև վերջ չհաշվարկված գնում ենք նման քայլերի»:
Հիմնական զեկուցող ՀՀ կառավարության առընթեր պետական գույքի կառավարման վարչության պետ Արման Սահակյանը Սևանի հետ համեմատությունը տեղին չհամարեց ու մանրամասնեց. «Այս օրենսդրական նախագիծն ընդամենը մասնավորեցման ծրագիր ներառելու մասին է: Հետագայում ինչպես և ով կմասնավորեցնի այդ ընկերությունը, դա այլ հարց է»:
Արման Սահակյանը նշեց, որ խնդիրն այն է, որ հավատարմագրային կառավարչի ժամկետն է լրանում ու հավաստիացրեց, որ մասնավորեցումը նպաստել է մեր երկրի տնտեսական զարգացմանը»:
ՀՀ ԱԺ ՀԱԿ խմբակցության պատգամավոր Գագիկ Ջհանգիրյանը մտահոգություն հայտնեց, թե ռազմավարական նշանակության բոլոր պետական օբյեկտները վաճառել են, Աստված չանի, որ իրական պատերազմական գործողությունների մեջ մտնենք, ի՞նչ ենք գրավ դնելու գումար վերցնենք: Այնուհետև մտահոգություն հայտնեց, թե հնարավոր է մասնավորեցումից հետո փոստային ծառայությունների սակագինը բարձրանա:
Կարդացեք նաև
Արման Սահակյանը կրկին առաջ բերեց կառավարչի ժամկետի լրանալու հարցը ու շեշտեց. «2016-ին լրանում է հավատարմագրային կառավարչի ժամկետը և այնպես չէ, որ այսօր հավատարմագրային կառավարիչն ինքը կցանկանա շարունակել ներդրումը հավատարմագրային 100 տոկոս պետական բաժնեմաս ունեցող կազմակերպությունում: Բիզնեսի տրամաբանության մեջ չէ»:
ՀՀ ԱԺ պատգամավոր Էդմոն Մարուքյանը զարմացավ, թե ո՞նց կարելի է նման ռազմավարական նշանակություն ունեցող կառույցը մասնավորեցնել ու բերեց ԱՄՆ օրինակը. «Այնտեղ անգամ վնասով աշխատելու պարագայում պետությունը սուբսիդավորում է ԱՄՆ-ի փոստը»:
Տաթև ՀԱՐՈՒԹՅՈՒՆՅԱՆ
