Ինչպես արդեն տեղեկացրել էինք՝ այսօր «Ազատության» հրապարակում տեղի ունեցավ էլեկտրաէներգիայի թանկացման դեմ հանրահավաք: «Ոչ թալանին» նախաձեռնության անդամներն իրենց ելույթներում նշեցին, որ իրենք չեն ընդունում Հանրային ծառայությունները կարգավորող հանձնաժողովի որոշումը՝ էլեկտրաէներգիան թանկացնել 6.93 դրամով:
«Երբ պարզ դարձավ, որ նախատեսվում է էլեկտրաէներգիայի թանկացում, կազմակերպվեց հանրային քննարկում: «Ոչ թալանին» քաղաքացիական նախաձեռնությունն ընտրեց պայքարի ուղին: Սա ՀՀ քաղաքացու պայքարն է՝ անկախ քաղաքական, կուսակցական հայացքներից: Հաշվի առնելով նախկինում ստեղծված այս շարժումների փորձը եւ հաջողությունները՝ որոշվեց, որ պայքարը պետք է տանել փողոցում՝ համախմբված եւ միասնական՝ բացառելով երկխոսությունը իշխանությունների հետ»,- ասաց նախաձեռնության անդամ Արամ Մանուկյանը: Նա նշեց, որ սա խնդիր է, որը վերաբերում է բոլորին:
Նախաձեռնության անդամները հիշեցրեցին, որ նախորդ տարիներին եւս հոսանքի գինը բարձրացել է, եւ ներկա սակագինն արդեն բարձր է: Ներկաներին ասացին, որ այստեղ չեն համոզելու, որ ընդունված որոշումը բեկանելի չէ, այստեղ են, որպեսզի տեր կանգնեն իրենց պահանջներին եւ իրավունքներին. «Մենք այս իշխանությունների ստրուկները չենք»,- ասացին նրանք: Մեղադրելով այսօրվա իշխանություններին՝ Սերժ Սարգսյանին, Հովիկ Աբրահամյանին եւ Ռոբերտ Նազարյանին՝ նշեցին, որ հոսանքի թանկացումն իրենք թույլ չեն տալու: Դրան ի պատասխան՝ հանրահավաքի մասնակիցները վանկարկեցին՝ «Սերժիկ, հեռացիր»:
Նախաձեռնության անդամներից Վաղինակ Շուշանյանն իր խոսքում ասաց, որ բոլորն են պատկերացնում, թե ինչ ապաշնորհների ձեռքն է ընկել երկրի կառավարումը, որոնք կեղեքում են ժողովրդին: «Այս իշխանություններն իրենց գործողություններով այլեւս վտանգ են մեր երկրի համար: Նրանց միակ նպատակն է հավերժացնել իրենց իշխանությունը՝ ազգաբնակչությանը այս երկրից լարելով: Իսկ դրա համար ամենանպատակահարմարը նրանց համար ժողովրդի սոցիալական բեռի ավելացումն է»,- ասաց նա:
Կարդացեք նաև
Նախաձեռնության անդամները, ինչպես արդեն նշել ենք՝ որոշեցին երթ չանցկացնել, պատճառաբանելով, թե այդպես կխուսափեն ոստիկանների հետ բախումներից: Նպատակահարմար համարեցին նստացույց սկսել, որը պետք է տեւի մինչեւ երկուշաբթի:
Սակայն Ազատության հրապարակում հավաքվածներին մոտեցավ Երեւանի փոխոստիկանապետ Վալերի Օսիպյանը՝ զգուշացնելով, որ նստացույցը կարող է տեւել մինչեւ այսօր 23:00: Փոխոստիկանապետը մեզ հետ զրույցում պատճառաբանեց, որ նստացույցի նախատեսված ժամը մինչեւ 23-ն է, դրանից հետո հավաքն արտոնված չէ: «Օրենքի սահմաններում կփորձենք պահպանել հասարակական կարգը»,- ասաց նա՝ նշելով, որ մնացած հարցերով դիմենք լրատվական ծառայություն:
Մեր դիտարկմանը, որ հանրահավաքի կազմակերպիչները երթ չսկսեցին՝ պատճառաբանելով, որ ոստիկանությունը օրվա երկրորդ կեսից արդեն պատրաստվում է ճնշել երթը, ջրցան մեքենաներ են նախապատրաստել դրա համար, Վալերի Օսիպյանը պատասխանեց. «Իսկ դուք դրա մեջ վատ բան եք տեսնո՞ւմ: Օրենքով է դա նախատեսված: Ոստիկանությունն ամեն ինչ անելու է օրենքի սահմաններում»:
Մանրամասները` տեսանյութում:
Հռիփսիմե ՀՈՎՀԱՆՆԻՍՅԱՆ
