Ամեն օր «Ոչ թալանին» նախաձեռնության երիտասարդ անդամները Բաղրամյան պողոտայում մի քանի անգամ հավաքում են իրենց զբաղեցրած տարածքում կուտակված աղբը, լցնում պոլիէթիլենե տոպրակները եւ կոկիկ դասավորում նախատեսված վայրերում մինչեւ մայրաքաղաքի աղբահան կազմակերպությունները դրանք կտանեն:
Երեկվանից, սակայն, աղբը մնացել էր փողոցում ու արդեն շոգից սկսել «բուրել»: Ակցիայի մասնակիցներից ոմանք կասկածում էին, թե դա դիտավորություն է: Բայց այսօր ժամը 13:00-ի սահմաններում «Սանիտեկ» ընկերության մեքենաները երեւացին ու փողոցը մաքրեցին: Դրանից մի քանի րոպե առաջ զրույց եղավ ակտիվիստների եւ աղբահանության ծառայության ներկայացուցչի միջեւ:
Վերջինն անդրադառնալով բողոքի ակցիայի մասնակիցների այն կարծիքին, թե աղբահանությունը դիտավորյալ չի իրականացվում, հիշեցրեց մեկ-երկու օր առաջ տեղի ունեցած միջադեպը, երբ ցույցի մասնակից երիտասարդներն իրենց ոչ համարժեք են պահել՝ բարձրացել են աղբահան մեքենայի վրա, դրոշներ ծածանել, արգելակել են ծառայության աշխատանքը: Ակտիվիստ զրուցակիցը համաձայնեց, որ նման բան եղել է, սակայն ընդգծեց, որ այդ երիտասարդներն իրենց հետ ոչ մի կապ չունեն եւ որ իրենք արդեն քայլեր ձեռնարկել են նման անցանկալի դեպքերը կանխարգելելու ուղղությամբ:
Կարդացեք նաև
Աղբահան ծառայության ներկայացուցիչը եւ նախաձեռնության անդամները պայմանավորվեցին այսուհետ էլ շարունակել համագործակցությունը, որ եղել է ակցիայի առաջին օրերին:
Աշոտ ՀԱԿՈԲՅԱՆ
