Համահայկական 6-րդ խաղերի ջահն այսօր Ջավախքից հասավ Գյումրի: Այն Գյումրու Բարգրատունյաց պուրակից կենտրոնական Վարդանանց հրապարակ մտցրեց աշխարհի եւ Եվրոպայի ծանրամարտի չեմպիոն Նազիկ Ավդալյանը, որտեղ և նրան դիմավորեցին ֆայտոնով, մոտոցիկլետներով, Գյումրու օրհներգով:
Շիրակի մարզպետարանի սպորտի բաժնի պետ Վաչիկ Վարդանյանը մեզ հետ զրույցում ասաց, որ այս ջահը կոչվում է Սփյուռքի ջահ, համահայկական խաղերում վառվելու են խորհրդանշանական երեք ջահեր՝ Հայաստան-Արցախ-Սփյուռք:
Ըստ պաշտոնյայի, Գյումրի բերված ջահը վառվել է Արևմտյան Հայաստանի Վանի Աղթամար կղզու Սուրբ Խաչ եկեղեցում: Այնուհետ անցկացնելով մի շարք հայաշատ վայրերով՝ Տիգրանակերտով, Էրզրումով, Կարսով, Անիով, Վանով, հասցրել են Ջավախք ու այնտեղից բերել Գյումրի:
Օգոստոսի 2-ին մեկնարկող ամառային համահայկական խաղերին Շիրակի մարզից կմասնակցեն Գյումրի, Արթիկ, Մարալիկ քաղաքները: Սպորտային մայրաքաղաք Գյումրին կմասնակցի 300 պատվիրակությամբ, Արթիկը՝ 40, Մարալիկը՝ 15: Վաչիկ Վարդանյանի տեղեկացմամբ, Գյումրին հանդես կգա 13 մարզաձևերում, Արթիկը՝ 3, իսկ Մարալիկը՝ 2: Գյումրեցի մարզիկները նախորդ խաղերում նվաճել են 10 ոսկյա մեդալ. չեմպիոններ են դարձել լողի թիմը, թեթև ատլետի ու սեղանի թենիսի թիմերը:
Կարդացեք նաև
Վաչիկ Վարդանյանի տեղեկացմամբ, Գյումրիից ջահը կտարվի Սարդարապատ, Սարդարապատից էլ ՝ Էջմիածին, որտեղ կստանա Վեհափառի օրհնությունը, իսկ օգոստոսի 2-ին 3 ջահերը միասին կբերվեն հանրապետական ստադիոն:
Շիրակի մարզպետ Ֆելիքս Ցոլակյանն իր ելույթում նշեց. «Օգոստոսի 2-ին Երևանում կմեկնարկեն Համահայկական ամառային 6-րդ խաղերը: Այս կարևորագույն մարզական ստուգատեսը ընդգրկված է Հայոց ցեղասպանության 100-րդ տարելիցին նվիրված պետական միջոցառումների ծրագրում և գտնվում է համայն հայության ուշադրության կենտրոնում:
Համահայկական խաղերը ոչ միայն մարզական մրցակցության պատշաճ դրսևորում են, այլ նաև ազգային միասնության կարևոր գործոն՝ աշխարհասփյուռ հայության շփման, մերձեցման ու Հայաստան-Արցախ-Սփյուռք կապերի ամրապնդման համար:
Եվ ահա այսօր մենք դիմավորեցինք խաղերի և հայ ժողովրդի միասնականությունը խորհրդանշող երեք ջահերից մեկը, որը վառվել է Վանի Ախթամար կղզու Սուրբ Խաչ եկեղեցում: Այն անցել է Տիգրանակերտն ու Բիթլիսը, Մուշն ու Էրզրումը, Անին ու Կարսը և Ջավախք աշխարհով հասել Գյումրի:
Համահայկական ամառային 6-րդ խաղերը մեզ համար կարևորվում են նաև նրանով, որ դրանց շրջանակներում առաջին անգամ Գյումրիում ևս անցկացվելու են մարզական միջոցառումներ՝ ֆուտբոլի և ֆուտզալի փնջային մրցաշարերը»:
Գյումրու քաղաքապետ Սամվել Բալասանյանն էլ պարծենալով, որ Գյումրին ոչ միայն մշակութային, այլ սպորտային մայրաքաղաք է. գյումրեցի մարզիկների շնորհիվ աշխարհով մեկ Հայոց եռագույն է ծածանվում, վստահությամբ նշեց, որ իր քաղաքը համահայկական խաղերում ևս կհաղթանակի: Սակայն սա, ըստ քաղաքապետի, կլինի բարեկամական հաղթանակ:
Նունե ԱՐԵՎՇԱՏՅԱՆ
