Aravot.am-ը ԱԺ ՀՀԿ-ական պատգամավոր Կարեն Ավագյանից հետաքրքրվեց՝ ինչպես է վերաբերում Սահմանադրության նոր նախագծի այն հոդվածին, ըստ որի ԱԺ պատգամավորը պետք է տիրապետի պետական լեզվին, եւ այդ դրույթը ենթադրում է, պատգամավորները մայրենի լեզվից քննություն պետք է հանձնեն կամ թեստ:
«Չեմ կարծում, որ դա պարտադիր պայման է կամ խանգարող հանգամանք է լինելու մեր քաղաքական գործիչների համար, որովհետեւ բոլոր այն մարդիկ, ովքեր ունեն հայկական կրթություն, սովորել եւ ավարտել են Հայաստանում, իրենց կյանքն ու գործունեությունն իրականացրել են այստեղ, բնականաբար քննության կարիք չի լինի: Ինձ թվում է խոսքը վերաբերում է ազգային այն փոքրամասնությունների ներկայացուցիչներին, ովքեր կփորձեն քաղաքականության մեջ հատկապես խորհրդարանում իրենց դերը ունենալ, որովհետեւ խորհրդարանում պաշտոնական լեզուն հայերենն է: Չնայած իմ կարծիքով դա սահմանադրի խնդիրը չէ, այլ օրենսդրինը, օրենսդիրն ինքը կկարողանա կարգավորել նմանատիպ ձեւակերպումները, այդ կոնկրետ հատվածի գոյությունը Սահմանադրության վերջնական տեքստի մեջ»,-ասաց Կարեն Ավագյանը:
Aravot.am-ի հարցին՝ իր տպավորությամբ իր գործընկերների քանի՞ տոկոսը 7,5-8 միավոր կհավաքի հայոց լեզվի տարրական թեստ լրացնելով, Կարեն Ավագյանի համոզմամբ, բոլորն էլ բարձր միավորներ կհավաքեն:
Կարդացեք նաև
Մեր հարցին՝ նույնիսկ Մհեր Սեդրակյա՞նը, Սուրիկ Խաչատրյանը, Սամվել Ալեքսանյա՞նը, Առաքել Մովսիսյանը եւ մյուսնե՞րը: «Բոլոր բոլորը…»,-պնդեց ՀՀԿ-ական պատգամավորը:
Ապա նեղսրտեց. «Ձեր համար Սահմանադրական նախագծերի քննարկումը սկսում եւ ավարտվում է նմանատիպ մակարդակի քննարկումներով, որի համար ես որպես պառլամենտի ներկայացուցիչ, այնքան էլ գոհ չեմ: Մենք պատրաստ ենք ավելի կառուցողական խոսակցության եւ աշխատանքի, իսկ դուք փորձում եք բոլոր յոթ գլուխների միջից միայն սա առանձնացնել»:
Գոհար ՀԱԿՈԲՅԱՆ
