Վանի քուրդ քաղաքապետ Բեքիր Քայայի թուրքերեն, հայերեն, քրդերեն և անգլերեն լեզուներով հրատարակած «ՎԱՆ» անունով գրքույկում խեղաթյուրված են փաստերը, և ընդամենը երկու անգամ է օգտագործվում հայ բառը, փոփոխված են հայկական տեղանունները: «Նոյյան տապան» մամուլի սրահում լրագրողների հետ հանդիպման ժամանակ տարածաշրջանային հարցերով փորձագետ–վերլուծաբան Սարգիս Հացպանյանը և պատմաբան, հրապարակախոս Գևորգ Յազըճյանն իրենց մտահոգությունները հայտնեցին այս հրատարակության առումով:
Պատմաբան, հրապարակախոս Գևորգ Յազըճյանը վրդովվեց. «Այս ամբողջ գրքույկում երկու տեղ է հայ բառը հիշատակվում, այն էլ այնպես է նկարագրվում, որ եկել ու անցել ենք, հայ գոյություն չունի: Կամ նշված է, թե Վանը մեծ ցավերի ու տանջանքների քաղաք է եղել, բայց ոչ մի բառ այդ մասին: Մեր քաղաքագիտական և պատմագիտական շրջանակները հորթի հրճվանքով ուրախանում են, որ մեկը քրդերի ու թուրքերի մեջ ճանաչում է Հայոց ցեղասպանությունը և ներողություն խնդրում: Հետո՞ ինչ, ո՞ւր է դրա հատուցումը»: Պարոն Յազըճյանը մտահոգություն հայտնեց, թե ՀՀ պաշտոնական շրջանակներում այսպիսիններին ոչ թե պետք է պատվեն շքանշաններով, այլ իրենց տեղը ցույց տան»:
Տարածաշրջանային հարցերով փորձագետ–վերլուծաբան Սարգիս Հացպանյանը նաև փաստեց, որ չորս լեզուներով տպագրված այս գրքույկի՝ մյուս լեզուներով տպագրված տարբերակներում՝ հայերենից բացի (թարգմանիչը հայ է), ընդհանրապես հայ բառը չի օգտագործվում և կան մի շարք խեղաթյուրումներ. «Ասում են ուրարտուները քրդական պետական միավոր են, բացի այս Վանի ամբողջ տեղանունները փոխված են, հայկական եկեղեցիները չեն նշվում, կամ չի նշվում հայոց թագավոր: Մինչդեռ Թուրքիայի զնդաններում գտնվող մեծ մտավորական Սևան Նշանյանն իր հրատարակած գրքում բոլոր Վանի տեղանուններն է նշում, որի արդյունքում պարզ է դառնում, որ տեղանունների ութսուն տոկոսը հայերեն է: Իսկ այժմ նույնիսկ Ախթամար կղզու անունն է խեղաթյուրված: Դիմել եմ Վանի քաղաքապետին ու նշել, թե մինչև այսօր թուրքերն էին այդ կեղծիքը անում, հիմա դո՞ւք սկսեցիք… Մինչդեռ ՀՀ պետական պաշտոնյա ներկայացող հայը գնում է Արևմտյան Հայաստան և գովեստի խոսքեր հնչեցնում»:
Որպես համեմատություն՝ պարոն Հացպանյանը նշեց, թե Տիգրանակերտում այլ է իրավիճակը. Հայաստանից գնացողներին Տիգրանակերտի (Դիարբեքիրի) քաղաքապետ Օսման Բայդեմիրն ասում է, թե դուք ոչ թե հյուր եք եկել, այլ՝ ձեր տուն:
Կարդացեք նաև
Հարցին՝ ինչպե՞ս կարող են նման երևույթներին դիմակայել ՀՀ իշխանությունները, պարոն Յազըճյանը պատասխանեց. «ՀՀ իշխանություններն առաջին հերթին ազգային արժանապատվություն պետք է ունենան, որ մնացածը կարողանան իրականացնել: Մոսկվայում լույս տեսնող քրդական «Դրուժբա» հանդեսը, որը խեղաթյուրում էր հայոց պատմությունը, ներկայացրի ՀՀ ԳԱԱ պատմության ինստիտուտի տնօրենին: Բայց ծպտուն չեղավ: Աշոտ Մելքոնյանը տարօրինակ պատասխան տվեց, թե ամեն մի շուն ու գելով չենք զբաղվելու: Եթե Արարատը հանում ես ֆուտբոլի շապիկների վրայից, ապա քուրդն էլ կգողանա քո հարստությունը, չեչենն էլ»:
Տաթև ՀԱՐՈՒԹՅՈՒՆՅԱՆ
Հ.Գ.- Նկատենք, որ այս օրերին Երեւանում էր Վանի քաղաքապետ Բեքիր Քայան, ով այցելել է Ծիծեռնակաբերդ: Այս մասին կարդացեք այստեղ:
