Հայաստանի 36-ամյա քաղաքացին Ուկրաինայի Լվովի մարզում պատանդ է վերցրել եւ ազատությունից զրկել 2 փախստականների, որոնք Վիետնամի քաղաքացիներ են: Այս տեղեկությունը հրապարակվել է Լվովի մարզի դատախազության կայքում:
«Արտասահմանցին մի տղամարդու եւ կնոջ, այս տարվա հուլիսի 2-ից, Լվովի Հոտկեւիչի փողոցում, նախօրոք վարձակալած տանը որպես պատանդ է պահել եւ նրանց հարազատներից 7.000 ԱՄՆ դոլար է պահանջել, որպեսզի ազատ արձակի»,- գրված է հաղորդագրությունում:
Ստանալով պահանջված գումարի մի մասը՝ 2000 ԱՄՆ դոլարը, Հայաստանի քաղաքացին պատանդներից մեկին բաց է թողել, իսկ մյուսին շարունակել է պատանդ պահել: Հուլիսի 20-ին նրա գտնվելու վայրը հայտնի է դարձել իրավապահներին եւ Հայաստանի քաղաքացուն ձերբակալել են: Բնակարանը, որտեղ պահվել է պատանդը, իրավապահները գրոհով են ազատագրել:
Հայաստանի քաղաքացուն մեղադրանք է առաջադրվել Ուկրաինայի քրեական օրենսգրքի 1-ին հոդվածի 147-րդ կետով (պատանդ պահել): Նրան սպառնում է 5-ից 8 տարվա ազատազրկում:
Կարդացեք նաև
Այս գործով նյութերը Լվովի դատախազությունն ուղարկել է դատարան:
Պատրաստեց Աշոտ ԻՍՐԱԵԼՅԱՆԸ
