Երեկ` սեպտեմբերի 18-ին, ժամը 22.00- 22.30-ի սահմաններում, Տավուշի մարզի սահմանամերձ Մովսես գյուղում սպանվել է Բերդի զինկոմ, գնդապետ, 49-ամյա Դերենիկ Անուշավանի Պապյանը: Նրա սպանության մեջ կասկածվում է համագյուղացի, 41-ամյա Արթուր Վաչիկի Մկրտումյանը: Ըստ ականատեսների՝ Արթուր Մկրտումյանը Մովսեսում արագ է իր վարել իր «Նիվա» մակնիշի մեքենան, ինչի պատճառով զինկոմը դիտողություն է արել, նրանց միջեւ եղել է վիճաբանություն: Դ. Պապյանը հարվածել է Ա. Մկրտումյանին: Դրանից հետո, ականատեսների վկայությամբ, Ա. Մկրտումյանը վերցրել է որսորդական հրացանը եւ կրակոցներով սպանել Պապյանին:
Մովսես գյուղից տեղեկացանք, որ Արթուր Մկրտումյանը պատշար վարպետ է: Դերենիկ Պապյանը մասնակցել է Բերդի տարածաշրջանի սահմանների պաշտպանությանը, նա եղել է գումարտակի հրամանատար: Ներկայումս նրա եղբայր Ռոբերտ Պապյանը Բերդի տարածաշրջանում գումարտակի հրամանատարի տեղակալ է՝ անձնակազմի հետ տարվող աշխատանքների գծով:
Մովսեսից հայտնեցին, որ Դերենիկ Պապյանի գումարտակի հրամանատար աշխատած ժամանակ Արթուր Մկրտումյանը եղել է նրա ենթական, դասակի հրամանատար, նրանց միջեւ տարաձայնություններ են եղել: Դեպքից հետո ոստիկանների կողմից ձերբակալվելուց հետո Ա. Մկրտումյանը ժպտացել է, որովհետեւ հարբած է եղել, նրա արյան մեջ ալկոհոլի պարունակությունը կազմել է 0,75 պրոմիլ:
Ոսկան ՍԱՐԳՍՅԱՆ
